E ley di destaho publico ta uno cu ta trahando riba dje desde aña 2012. Fraccion di AVP ta hopi contento cu e gabinete actual a sigui cune, pasobra e ta un ley importante. E ley aki ta pone e reglanan nobo pa loke ta trata destaho publico. Gobierno no a duna un fecha p’e ta na vigor, pero kier un tempo pa por prepara departamentonan riba esaki.

E excepcionnan pa bay den destaho publico tabata conoci bou di Comptabiliteitsverordening di aña 1989, esta e ley di contabilidad, articulo 25 y 26 ta disparce. Di e forma ey e ta bira hopi mas transparente y e ta duna tur hende oportunidadnan igual, segun parlamentario di fraccion di AVP Arends. E ley ta hopi mas proporcional, pero tambe ta duna un siguransa na proveedornan di servicio na gobierno.

Fraccion di AVP ta hopi contento y ta felicita e departamentonan cu a traha den e ley aki, entre nan, departamento di asuntonan economico, Directie Financiën, Directie Wetgeving y Centrale Accountantsdienst. E ta un ley moderno y ta cumpli cu e obligacionnan internacional cu Aruba tin pa e “Government Procurement Act” di WTO, cu ta e organisacion mundial di comercio. Tratadonan cu pais Aruba ta participe di dje for di aña 1992.

Pa loke ta e reunion mes desafortunadamente no a bay hopi riba e contenido, pero fraccion di AVP a asumi su responsabilidad y a duna un contribucion positivo. Tabata tin varios reunion tecnico di e comision fiho di asuntonan economico y di finanzas den e fase preparatorio pa e tratamento di e ley. Awe por mira atras riba un producto legal cu pais Aruba por ta orguyoso di dje.

Parlamentario Arends ta kere na momento di implementa e ley aki debidamente e lo contribui na mas transparencia den uzo di fondonan publico, pero tambe e reglanan ora di bay den destaho publico pa proyectonan di gobierno.

6 aña pa traha ley
E ta un ley cu a cuminsa traha riba dje for di aña 2012 y desde aña pasa na juli ta cerca Parlamento. A dura casi 1 aña pa despues cu e comision fiho a haya presentacionnan tecnico di diferente departamento. A haci preguntanan, a inicia tratamento di e reunion aki na oktober di aña pasa y esey a culmina despues di casi 1 aña cu e ley aki a yega Parlamento, unda a trat’e y aprob’e.

E ley aki no tin un fecha pa ta na vigor. A regla un parti so y gobierno a indica cu nan mester di 1 aña mas pa por prepara diferente departamentonan. Mester ekipa nan y tambe pa loke ta trata e proveedornan di servicio di producto pa splica nan kico ta e proceduranan nobo di gobierno. Fraccion di AVP a haci un yamada si na Gobierno pa cuminsa actua den linea di e espirito di e ley.

 

LEAVE A REPLY

Please enter your comment!
Please enter your name here