Ayera, gabinete Hulandes a duna informacion riba relahacion di medidanan di coronavirus na e pais. Den esaki, pronto ta permiti pa ciudadanonan Hulandes biaha den exterior. Sinembargo, codigo pa Aruba, y resto di parti Caribense di Reino, ta keda oraño.
Codigo oraño ta indica cu biahe na e paisnan cu e codigo aki ta descurasha. Na momento di bolbe, por pidi biaheronan pa bay den cuarentena. Ta eliminando e recomendacion pa no biaha den exterior cuminsando dia 15 di mei, segun minister encarga di Salubridad Publico, Hugo de Jonge a bisa. Cuminsando e fecha aki, lo permiti biahe na paisnan cu nivel di riesgo geel of berde, tanten cu hende cumpli cu protocol di coronavirus di e paisnan aki. “Pero tene na cuenta cu otro paisnan tambe por nenga entrada na persona di Hulanda pasobra nan ta considera nos un pais di riesgo halto”, De Jonge a bisa.
Segun informacion den medionan di comunicacion Hulandes, minister encarga di Salubridad Publico di Hulanda, Hugo de Jonge a declara cu toch e ta anticipa cu ciudadanonan lo por biaha di Hulanda pa e islanan e berano aki ainda.
Motibo pakico no a cambia nivel di alerta di Aruba di oraño pa geel, ta e presion riba sistema di cuido di salud y e capacidad di ICU riba e islanan.
Anteriormente Gabinete Hulandes a bisa cu nan kier tuma un decision tocante introduccion di certificadonan di vacunacion di Covid-19 na comienso di juni, tres siman prome cu loke Union Europeo kier. De Jonge a argumenta cu e pais mester tuma resto di mei pa considera tur aspecto di e regulacion pa yuda reanuda biahe internacional prome cu vakantie di berano.
