Partido RAIZ a logra e cantidad di firma pa participa den eleccion 2021

Ayera mainta, partido RAIZ a duna di conoce cu nan tambe lo participa den eleccion di dia 25 di juni, pa motibo cu nan a logra di yega na e cantidad di 587 firma cu tabata necesario pa asina lista di e partido aki por ta inclui den proximo eleccion.

Asina lider di e partido Ursell Arends a informa pa medionan di comunicacion local. Na mes momento el a expresa e gradicimento na esnan cu a bay na e distinto localidad pa duna sosten na e partido aki.

“Awor nos cu nos candidatonan ta bay enfoca tur nos energia pa sigui cu e proximo mision primordial, e cual ta pa pone e voz di pueblo resona dia 25 di juni”, Arends a expresa.

Di mesun forma, el a sigura cu nan a logra completa e mision aki pa asina kita tur duda cu RAIZ ta cla pa bay eleccion 2021.“Slucion en bes di tradicion, esey ta loke nos a logra”, el a sigura.

Di loke ta trata e partidonan cu te ainda no a logra di haya e cantidad di firma cu ta necesario pa participa den eleccion, Arends a menciona cu esey no ta facil. “Keda cu bo cabes na laira, pasobra bo mester pasa den proceso akinan pa bo por ta un representante di un di tanto voznan di nos Aruba”, el a bisa.

Tocante e proceso di colecta di firma, Arends a indica cu nan ta contento con e proceso aki a bay. “Nos sa cu ora tin cambio semper lo tin critica.” El a bisa cu na aña 2017 e proceso a bay di un otro forma y aworaki, mirando cu tin protocol pa loke ta trata Covid-19, e proceso ta bay cambia un poco. “Cu cambio semper ta bin resistencia y nos ta compronde esey”, el a señala.

Manera a keda conoci, tin tres partido cu ta vocifera cu e proceso di colecta di firma no ta bayendo bon, y pa cu esaki Arends a comenta cu nan sostenedonan cu a firma pa partido RAIZ a keda satisfecho. “Si a nan como sostenedo ta satisfecho, esey kiermen cu ta duna impresion cu tabata canando bon”.

Awor e reto mas grandi pa Arends ta cu tur partido por yega mas cerca di e pueblo, den seis siman dilanti nan ta bay informa e comunidad kico ta e vision di e partido pa di e manera ey Aruba por vota pa un vision, pa solucionnan berdadero cu tanto e pueblo ta anhela, segun loke e mes a menciona.