E dia di awe na Museo Arkeologico Nacional Aruba ta bay tuma luga un lectura cu ta forma parti di un ciclo di charla tocante hoyanan di herencia arkeologico cultural subacuatico na Aruba.

Drs. Raymundo Dijkhoff a informa cu comunidad di Aruba ta invita pa awe for di 7.30or te cu 9or di anochi pa conoce un tiki mas tocante esaki, unda cu mayoria di hende ta custuma di conoce e parti terestre solamente, pero Aruba tin hopi den su awanan teritorial.

Esaki ta pa motibo cu ser humano semper tabatin relacion cu awa, pero e desaroyo di e parti aki di arkeologia aworaki ta acelerando. Aruba tambe ta den dje pa basta aña caba pero tambe ta saliendo di dje, pa motibo cu reino completo desde 2019 ta bin trahando riba esaki y pa fin di aña aki of comienso di otro aña por ratifica e tratado di UNESCO di 2001, cu ta tocante proteccion di nos herencia subacuatico.

70 pais rond di mundo a ratifica esaki caba, pero ainda Aruba no a hacie directamente, pa motibo cu na 2019 a logra di convence Hulanda pa cierto motibonan logistico y den e parti legal cu tabata un tiki dificil pa por a ratifik’e, pero awor segun Dijkhoff a splica “tur cos ta cla”.

Den cuadro di esey, nan kier conscientisa e pueblo Arubano kico esaki ta encera, pa motibo cu e ta un legislacion y un maneho y Aruba tin hopi documentacion y mas di esey ta bay bin cu un maneho cu mester bay wordo imponi riba e area aki.

“Hopi biaha nos no ta wak esaki, pero Aruba nos tin cu wak e parti terrestre arkeologico hunto cu e parti subacuatico y nos a bin haya cu aña pasa ora ma haci un research, nos a haya mas di 100 sitio arkeologico den nos awa teritorial”.

Tambe el a sigura cu el a haci un investigacion basta grandi unda cu otro luna ta bay duna informacion di esey y ademas di e presentacion cu e ta bay haci tambe e ta bay mustra full e desaroyo di añanan 40 te cu aworaki na Aruba, tur lo cual a wordo haci, kico a wordo haya, con e desaroyo a bay y na unda Aruba ta para awe.

“Lo haya full un bista di e rikesa increibel cu Aruba tin den e parti aki pero ta dificil pa trece afo pasobra bo no tin e cuadro legal pa proteccion”, el a sigura.

Dijkhoff a expresa cu cultura y identidad tin cu wak e historia di nos pais, cu nan como arkeologo ta investiga e restonan di e cultura material di e pasado, esey kiermen, riba tera y den awa, cu esaki semper ta bay beneficia e pais den conocemento pa motibo cu e no ta bay splica con importante ta pa personanan conoce nan pasado, pero tambe e ta bay refleha e cultura, esaki ta bay duna informacion di kico a pasa den pasado pa personanan mas por wordo amplia esaki awor of den futuro.

“E ta hopi interesante mi ta kere riba su mes pa bo sa cu mas cu Aruba ta mas cu nobenta of nobenta cinco miyon aña bieu geologicamente y nos tin rasnan di ser humano di 1.500 aña prome cu Cristo na Aruba, cu nos ta bay haya sa aworaki kico tur a wordo haci den nos awanan cu ta bay duna un empuhe mas grandi di nos conocemento di Aruba di e pasado cu mi ta sigur cu cada un ta bay ta interesa pa sa esaki”, Dijkhoff a menciona.

Den su opinion tambe el a sigura cu esaki ta bay engrandece e mesun cultura di Aruba y tambe por engrandece otro como turismo y desaroyo economico cu por link su bo tin legislacion na su luga por ehemplo, por bay sitionan subacuatico pa beneficio economico y turistico “nos tin hopi posibilidad pero esey nos tin cu bay desaroya den e siguiente añanan cu ta bay bin.

Di loke ta trata e charla, e ta dirigi tanto pa stakeholders como pa hende cu ta haci actividadnan acuatico of interes acuatico, band’i di esey tin e buceadonan, piscadonan, companianan cu ta haci desaroyo economico riba awa pero den general e ta dirigi pa tur hende pa acerca Museo Arkeologico pa wak algo cu por ta nan no ta sigur di sa y cu hunto cu Dijkhoff ta desea pa cuminsa desaroya y preserva.

Esaki lo tuma luga den auditorio di Museo Arkeologico unda cu pa via di trabaonan di mantencion den e parti frontal di e museo nan ta pidi e personanan pa drenta den e parti patras na e porta di hardin, entrada ta gratis.