Aruba ta ocupa e puesto number 75, y Corsou e puesto number 90 riba e Indice di Secresia Financiero publica ayera. Hulanda ta na di 12 lugar den e clasificacion, cual ta lidera pa Merca.

Cu e Indice di Secresia Financiero bienal, e Tax Justice Network, den colaboracion cu Oxfam Novib, ta delinea cua paisnan ta mas atractivo pa sconde activonan y evadi impuesto of laba placa. Sint Maarten no ta aparece riba e lista di 141 pais. Esaki segun un relato den portal noticiero di Corsou, CuraçaoChronicle.

E Indice aki ta clasifica paisnan mundialmente basa riba nan sistemanan legal y financiero, y e grado na cual nan ta permiti individuo- y companianan sconde activonan y laba placa. E lista di e aña aki tin Merca den top, sigui pa Suisa y Singapore. Hulanda ta na di 12 lugar, y ta den un situacion pio cu ‘tax havens’ notorio manera Cayman Islands y Cyprus.

Milou Geuns, experto di impuesto na Oxfam Novib, a comenta: “E problemanan rond di supervision y cumplimento di sancionnan contra Rusia, por ehemplo, ta revela pakico Hulanda ta asina halto den e clasificacion nobo. Nos no mester sigui facilita evasornan di impuesto, corupcion, crimen organisa y oligarcanan na Hulanda. Esaki ta empeora mas ainda e desigualdad mundial.”

Di su banda, Arnold Merkis, coordinador di Tax Justice Netherlands, a comenta: “Nos no ta sorprendi pa e mal score un biaha mas pa Hulanda. Ainda ta hacie demasiado facil pa disfrasa bo propiedad of structura di evasion di impuesto via Hulanda. Si realmente nos kier combati abuso, nos mester traha pa cambia esaki.”

Un motibo importante pakico Hulanda ainda tin un posicion halto den e Indice, segun CuraçaoChronicle, ta pa motibo di e falta di transparencia den e area di ultimate beneficial ownership (UBO). Secresia den e punto particular aki ta yuda e individuonan mas afluente, criminal, y companianan pa sconde nan activonan y asina evita di paga impuesto of evadi sancionnan, por ehemplo. Na Hulanda, sancionnan – manera freeze activonan y obstrui transaccionnan financiero – por wordo evita pasobra no tin suficiente bista riba activonan, y hopi biaha ta dificil pa track e doño di un compania estableci na Hulanda.

 

LEAVE A REPLY

Please enter your comment!
Please enter your name here