ORANJESTAD – E caso di un Rubiano bibando na Merca y envolvi den un acto criminal na Merca a cuminsa plama den social media.
Un noticia divulga pa medio di e website di noticia The Palm Beach Post ta indica cu Reinier Koole a wordo deteni envolvi den un caso di candela intencional di un trailer condiciona como un vivienda. Tambe e ta sospechoso di e asesinato di un persona, Ramon Eduardo Herrera den e area di Palm Beach. Herrera a muri victima di varios hinca.
Reinier mes ta un persona basta conoci na Aruba envolvi den diferente cos straño cu el a yega di realisa riba nos isla manera bula for di brug di hotel como tambe filma su mes ta maniobra na muraya di KIA. Segun datos cu nos por a ricibi, e tin un record criminal di nada di gaba na Merca.
Informacion divulga pa The Palm Beach Post ta indica cu Koole di 42 aña bibando na Delray Beach y conoci como “E Flaco” a keda aresta como sospechoso di a cende e trailer na candela, mientras su amigo tabata paden. Ta trata di Herrera-Morades kende a muri victima di varios hinca di un flecha.
Un testigo a laga sa cu el a wak e tipo di flecha aki den e bahul di Koole su auto. Tur cos ta indica cu Herrera tabata paden di e trailer ora cu Koole a cend’e na candela. Tambe cu a start un discusion entre Koole y Herrera durante un fiesta cu varios amigo, unda cu nan aparentemente a bebe alcohol y consumi droga. E caso aki ta bou investigacion ainda.
Potret uza ta e mesun cu a ser uza pa e fuente The Palm Beach Post.
