Bon Dia a bolbe sinta cu hoben empresario Phil Hunt kende ta un di e unico Arubiano conoci cu tin exito den e mercado di Amazon cu su producto Hunt Brothers Coffee Grinder pa papia un rato tocante su exito den Online Business y tambe riba e tayer di dos dia cu el a caba di duna aki na Aruba. E meta di e tayer aki tabata pa comparti informacion hopi valioso na con bo por cuminsa bo mesun Online Business cu segun Phil, esaki por ta un alternativa hopi exitoso pa yuda hiba e economia di Aruba padilanti.
”Mi no sa si ami ta e unico Arubiano cu tin exito den e mercado internacional di Amazon, pero mi obhetivo ta pa yuda inspira y duna hende curashi pa cuminsa traha riba nan mes. No ta tur ora bo mester traha pa hende pa semper pasobra abo tambe por bira un creador di trabao.” Phil ta bisa. Nos no por laga esaki den man di hende stranhero so pa habri negoshi aki na Aruba kende sinembargo ta haciendo un tremendo trabao den esaki pa varios decada caba. No ta laga afo cu nos mesun hendenan tambe tin e mesun capacidad cu cualkier otro hende di otro pais pa maneha un negoshi segun Phil ta bisa Bon Dia.
”E proceso pa haci e tayer aki a cuminsa ora cu mi a realisa cu na Aruba tin hende interesa den cuminsa un Online Business, anto pa motibo cu ami tin esey, mi a dicidi di formula esaki den un manera cu e por wordo implementa pa medio di hende cu ta biba na Aruba”, Phil ta splica Bon Dia. Asina e proceso a cuminsa di crea e contenido cual ta basa riba su mesun experiencia hunto cu tur locual el a siña manehando un Online Business anto adaptando esaki den un manera cu e pueblo di Aruba por compronde con pa lansa un Online Business riba nan mes.
”Bisa bo berdad, mi a haya puro bon feedback cual pa ami tabata un poco malo pasobra mi kier mehora e proceso. E unico feedback cu mi a haya tabata bon ta pa mi no desvia di topico ora cu mi tin demasiado pregunta, sinembargo e feedback den general tabata uno positivo” , Phil ta bisa Bon Dia. Den futuro, Phil ta splica cu e kier sigui elabora loke ta Online Business, pa atrae mas studiantenan nobo anto tambe bin cu cursonan mas largo cu por yuda hende cu henter e proceso di lanta y mantene un Online Business. ”Aworaki e proceso cu mi a splica tabata e comienso y con pa lansa un negoshi Online. Pa motibo di tempo y contenido, e ta mucho hopi pa absorbe pa sigui den e proximo stapnan. Mi lo kier gusta traha cu hende for di comienso te fin te unda cu nan no mester bin cerca mi mas y por bay riba nan mes y tin exito den nan negoshi”, Phil ta bisa Bon Dia.
Online Business por ta un miho alternativa pa comerciantenan Arubiano?
Tur hende cu a atende e tayer aki a siña algo segun Phil anto e contenido tabata bon cual tabata e intencion di esaki. ”Mi ta haya cu e parti Online por yuda hopi Arubiano pa resalta economicamente, mi ta kere cu si tin mas hende economicamente stabiel den e pais completo, esaki ta drecha e economia y mi ta haya cu Arubiano mester cuminsa lanta para no solamente Online pero fisicamente tambe anto cuminsa habri negoshinan” , Phil ta splica Bon Dia.
”Mi conseho ta, siña e contenido, wak tin eyfo , wak kico ta facil y aplicabel pa abo y si bo dicidi pa haci e, djis haci e y no laga nada wanta bo atras. Tin hopi cos cu por wanta bo atras, porta e ta duda, pero si nunca bo no haci e y tin e riesgo anto siña, nunca lo bo tin e exito cu bo ta desea. Si bo ta un atleta , si nunca bo bay competi bo no ta bay logra nada cun’e. Cuminsa cana un caminda y a base di loke bo siña, pone esaki den practica. Si bo por yega na tin bo mesun cas y bo mesun auto, bo por tin bo mesun negoshi tambe esaki ta posibel kiermen no laga nada limita bo” , Phil a bisa.
