Asamblea Nacional di Venezuela: inflacion por yega 10.000% na 2018

(ElNacional) – Inflacion na Venezuela a cera 2017 na 2.616 % y por yega te na 10.000 % e aña aki, segun datonan cu Asamblea Nacional (AN, parlamento), di mayoria opositor, a presenta mirando ausencia di informacion tocante e indicadornan aki di parti di Banco Central (BCV). E presidente di e Comision di Finanzas di AN, e opositor José Guerra, a indica den un rueda di prensa cu e inflacion di e pais “ta na careda, pa via di Banco Central cu ta print placa pa financia e deficit di gobierno” di Nicolás Maduro. “ 70 % di e deficit di gobierno Venezolano pa aña 2017 tabata financia a traves di print placa,” Guerra a bisa, ken a agrega: “Inflacion ta diferente cu hiperinflacion, pasobra inflacion den tur cos ta normal. Un hiperinflacion ta insoportabel.

E ta ruina un pais.” Segun diputado Guerra, economista di profesion y cu un trayectoria largo na Banco Central tras di lomba, “nos ta papiando di un inflacion cu por pasa 10.000 % si BCV sigui financia gobierno.”

E legislado a bisa cu solamente den ultimo luna di december e inflacion tabata 85%, y a remarca cu den comparacion cu otro caso di hiperinflacion registra siglo pasa riba e continente, esun di Venezuela ainda “no ta e caso mas fuerte” pero “e aña aki e por bira.” Tambe el a afirma cu e Comision ainda no a publica e indice di caida di e Producto Interno Bruto (PIB). Di su parti, e diputado Rafael Guzmán, miembro di e Comision di Finanzas di Parlamento, a critica e constante aumentonan salarial anuncia pa gobierno, pa trata di contraresta e explosion di prijs, un “guera economico” segun e Chavistanan.
“No tin aumento di salario cu por combati e situacion aki,” e diputado opositor a enfatisa, ken a proyecta e cifra di inflacion pa 2018 na 14.000 %.Guzmán a referi ademas na e caida di e bolivar compara cu dollar riba mercado paralelo, como un di e causanan cu prijsnan ta aumenta casi diariamente na e pais, y a señala e control di cambio imponi pa gobierno Chavista desde 2003, como e causa di e depreciacion aki. Recientemente otro experto, entre otro Francisco Ibarra, director di e compania di analisis economico Econométrica, a pronostica cu e inflacion na Venezuela por alcansa e nivel di 30.000% e aña aki.

You May Also Like

Brasil: Lo duna residencia permanente na inmigrante Venezolano

(JornaldoBrasil) – Venezolanonan cu tin residencia temporal na Brasil pa dos aña lo por ...

Operacion di rescate lo cuminsa awe

Dos montañista cu a keda identifica como Jesús Fernández, di 63 aña y Yusmarly ...

Grupo arma a asesina cinco persona na Colombia

Cinco persona a muri y mas di 50 a keda desplasa durante un atake di ...

Chile: Piñera ta critica Bachelet pa no condena ‘dictadura di Maduro’

SANTIAGO (NTN24) – E presidente Chileno, Sebastian Piñera a reprocha su antecesor y alto ...

Nochi di sanger na Sao Paulo: Banda criminal a mata nuebe persona

Por lo menos nuebe persona a muri den dos episodio cu a tuma lugar ...

Despues di critica fuerte, Puerto Rico ta spera di habri mayoria di scol awe

Departamento di Educacion di Puerto Rico ta spera di habri 80% di e 1.113 scol ...