Asociacion di Dentista di Aruba a pone na conocemento di comunidad cu nan a introduci un protocol pa e dentistanan local atende cu nan pashentnan pa asina evita cualkier contagio cu e coronavirus of Covid-19, ya cu boca ta un di e via factibel pa e virus aki por drenta bo curpa.

E anuncio ta uno oportuno, despues cu un video relaciona cu un ortodoncista local y un assistent di dje cu a abstene di atende directamente cu un pashent, cumpliendo cu exigencia di DVG, a bira viral recientemente.

Presidente di e asociacion aki, Lindsey Tromp, a duna conoce algun decision pa e dunado di cuido oral pa medio di un protocol basa riba diferente guia y recomendacion, y nan a drenta na vigor desde 16 di maart ultimo. E protocol ta keda vigente te cu 31 di maart. E ta un periodo pa nan evalua internamente y si ta necesario nan lo prolong’e y/of ahusta. “Tur cos ta depende di e situacion di e crisis di e corona,” el a bisa.

E protocol ta indica entre otro cu tur tratamento regular ta keda posponi. Kiermen nan no ta brindando e servicio normal y nan consultorio ta cera. Sin embargo nan ta keda disponibel pa nan pashentnan via telefon y tambe via e-mail. Solamente nan lo atende casonan di emergencia na e consultorio. E protocol aki ta aplicabel pa e pashentnan cu no tin sintoma di griep, problema pa hala rosea, etc.

Nan lo haci un screening na e pashent prome cu e ta wordo atendi pa un caso di urgencia y e dunado di cuido oral lo tuma un decision a base di e informacion aki, si e ta di emergencia of no. El a solicita pa suministra mas informacion posible y tambe honesto na bo dunado di cuido oral. E caso di urgencia lo wordo atendi segun cita confirma telefonicamente of via e-mail. Pues e consultorio no ta ricibi pashent sin cita. Den caso cu e pashent cu Covid-19 tin un caso di emergencia esaki tin cu bay pa medio di coordinacion di DVG, y esaki ta conta pa e personanan cu ta den cuarentena tambe.

E manera di traha lo ta diferente cu lo normal. El a bisa cu lo tin mas distanciamento cu e pashent. Lo evita aglomeracion den e sala di spera, y e solamente e pashent por bin compaña cu un persona so si ta necesario. Ta importante pa bo keda pendiente di cualkier informacion cu bo mesun dunado di cuido oral ta divulga, sea via social media, avisonan na porta di consultorio, etc.

Nan ta consciente cu e maneho aki por trece cierto inconveniencia cu ne. Pero nan a opta pa introduci e protocol y maneho aki pa diferente motibo, particularmente pa e situacion cu nos pais y mundo henter ta pasando aden pa causa di e coronavirus. Lindsey Tromp a bisa cu e motibo mas importante tin di haci pa salvaguardia salubridad publico. El a laga sa cu e asociacion aki ta representa mayoria di dentistanan na Aruba y ta conta cu e miembresia di tres di e seis ortodoncista cu tin na Aruba. P’esey como dunado di cuido oral nan ta haci loke ta esencial pa salvaguardia salubridad publico.

LEAVE A REPLY

Please enter your comment!
Please enter your name here