E falta di responsabilidad di algun hende den cuarentena a bira un preocupacion den comunidad, principalmente mirando e situacion cu Italia y Spaña ta pasando aden.

Tin proposicion cu a bin di e mesun comunidad y cu a yega te na oido di e mesun minister di Salubridad Publico, Dangui Oduber pa purba contene cu e coronavirus of Covid-19 por sigui plama riba nos isla. Esaki mirando cu tin hendenan den cuarentena y cu no ta atende nan mes na e reglanan y instruccion duna pa DVG.

Oduber a referi riba e posibilidad di pone nan den cuarentena no na nan cas, sino ya sea den un hotel, logicamente cu tur material y ayudo medico y profesional necesario. E mandatario a indica cu esaki un comentario y te hasta un di e tipo di escenario cu nan ta discuti diariamente den seno di crisis team.

El a bisa cu tin dos situacion cu por wordo presenta, ya cu si nan ta hiba e 800 pico hendenan den cuarentena pa un hotel, e ta un forma pa isola nan for di resto di nos poblacion y ambiente cu nan ta aden pa evita di contagia otro personanan. Pero e otro situacion ta cu ora bo ta hiba e cantidad di hende aki den un hotel, bo ta core e risico cu si un di e persona ey ta resulta positivo den un ‘solo tiro bo tin 800 hende contagia cu e virus aki,” el a bisa.

Di su banda, Sharline Koolman di departamento di Malesa Contagioso a bisa cu nan ta tende constantemente cu personanan no ta atendiendo debidamente na e cuarentena. E no ta papiando di e hendenan cu a biaha afo so, pero personanan cu ta den cuarentena pasobra nan tabatin contacto cu e persona cu ta isola y cu tin e virus. Esey ta wordo refleha den e cantidad di caso cu ta subiendo.

Task force

Koolman a anuncia cu a bin cu un task force pa ehecuta algun medida di control mas severo. Pero mester bin cu algun areglo prome, specialmente di personal, pa por ehecut’e. Koolman a laga sa cu si mester bin cu mas medida, nan lo conseha gobierno tambe pa bin cu medidanan mas drastico.

Encuanto e posibilidad di interna e personanan den un centro di atencion special, Koolman a contesta cu e conseho aki a bin no solo na Aruba, sino den otro pais tambe, ora cu un persona ta sali positivo. Tin pais cu ta opta pa pidi tur esnan cu ta biba cune den cas por bay otro caminda. Esaki ta den caso cu e cas no ta brinda e oportunidad pa e persona isola por keda su so den un camber cu su baño particular. Tur esaki pa evita e transmision.

Riba e maneho cu ta wordo hiba na Aruba, el a señala cu tene e hendenan positivo of den cuarentena den nan cas ta posibel, semper cu nan ta atende y cumpli cabalmente cu e reglanan di higiena pa preveni e contagio pa otro hendenan den cas. El a indica cu esaki a yega di sosode na China, Italia y otro paisnan. “Esey por! Pero esey atrobe bao medidanan di higiena hopi stricto,” el a bisa.

LEAVE A REPLY

Please enter your comment!
Please enter your name here