editorial.jpg

Despues di bastante tempo sin director permanente, noticia ta cu Departamento di Asunto Social tin un director nobo. Un persona cu un  CV bastante amplio den entre otro ramo di asunto social na Hulanda, y a base di un diploma den psicologia y sociologia di Universidad di Tilburg. Sinembargo, tema di e editorial aki no ta e cualificacionnan di e persona aki, cu nos ta desea tur exito den su funcion nobo.

Prome cu e nombramento aki a tuma luga, tabatin rumor insistente di posibel nombramento di personanan perteneciente na e circulonan politico alrededor di ministronan, pero finalmente esakinan, si nan tabata na horizonte mes, no a keda concretisa. Den un di e casonan, a surgi un consternacion den e departamento ora aparentemente a bira conoci detayenan di pasado laboral di e persona cu no ta cuadra cu nombramento, ni como director o den otro funcion. Mas desaroyo riba e caso aki lo por spera e siman aki.

Pero ta parce nos un bon ocasion pa para keto un rato awor aki y observa e situacion di e trabao di e departamento, cu logicamente ta dirigi na apoya esnan den nos comunidad cu mas problema pa haya nan caminda den bida. Den ultimo aƱanan e trabao aki a conoce bastante reto, sin cu realmente tabata mira un plan y strategia cu ta contempla atende tendencia di ultimo aƱanan,  y esunnan cu tin nan presencia pa basta aƱa caba. Na prome luga e cuadro general di e desaroyo socioeconomico di ultimo aƱanan. Nos por a observa cu bao influencia di e pakete amplio di medida, e poder di compra den su totalidad a bay atras. Esaki a mishi cu cartera di tur hende pero mas ainda di esnan cu tin e entradanan mas chikito.

Esaki a pesar cu gobierno a intenta haci algo, mehorando e entrada di esnan cu tin onderstand (ā€˜onderstandā€™) cu extra toelage pa yiu cu ta bay scol, etc. Tambe e extra beneficio (ā€˜reparatietoeslagā€™) pa tur trahado bao di Afl. 2500 pa luna cu e dunado di trabao mester duna mensualmente y haya esaki di otro forma di gobierno den areglo di cuenta di e compania cu belasting. Pero e golpinan financiero di otro banda tabata hopi mas fuerte. Un ilustracion: ora cu a mehora e salarionan minimo e aƱa aki, esey a aumenta e salario minimo cu mas o menos Afl. 40 florin pa luna. Pero si nos djis tuma e ultimo aumento di tarifa di Arubus, por constata cu esaki so caba a deshaci di henter e aumento di salario minimo, pa esnan cu ta uza bus tur dia pa yega trabao. Y e persona ey no a ni yega supermercado ainda… Y e aumento a bira necesario pa yuda paga e tram ademas…

En todo caso no a soluciona e problemanan financiero entre esnan mas vulnerable, y ta bira bisto den problema social creciente di diferente indole. Na mesun momento presion pa austerisa a hiba gobierno na corta den presupuesto di cantidad di fundacion cu ta sostene e trabao di atencion y cuido extra cu tin tur su derecho di existencia. Es mas, sin e trabao necesario aki ta atentando contra bienestar di comunidad.

Mey mey di tur e desaroyo desfaborabel aki, gobierno a bin algun aƱa atras caba riba e idea idiota pa termina cu e oficinanan den districto, y concentra tur cos na e oficina central na Playa. Pa nos comprende bon: mientras decadanan pasa, a crea e oficinanan den districto, cu e filosofia di por atende e clientela mas cerca cas, pasobra ta trata di un grupo mas vulnerable cu tin problema pa yega segun e distancia ta mas grandi. Nunca ningun ministro a duna un splicacion drechi pa e locura aki, cu simplemente a haci trabao mas dificil pa tur esnan envolvi.

Un bon seƱal ta cu recientemente ministro di Asunto Social, cu a hereda henter e situacion aki di su predecesor, a anuncia cu lo habri un sucursal den e edificio multifuncional nobo na Paradera, loke por ta un indicacion cu por tin un cambio di maneho cu posiblemente ta bay den direccion di reestablece trabao den e diferente districtonan. Sin embargo, te awor no tin un claridad ainda tocante e otro districtonan manera San Nicolas, Santa Cruz y Savaneta pa por sa sigur cu e cambio di maneho ta un realidad. Mester bisa cu tanto den pasado como awor ta anuncia cambio pero no tin splicacion di e maneho tras di esaki. Esey tin su logica (politico) y unda no kier critica ningun colega y tampoco kier revela e berdadero maneho (destructivo) di kibra structura y trabao concreto di e sector aki. Por observa cu tin mas ministerio unda e politica di destruccion ta tuma luga, por ehemplo den ministerio di Husticia unda a elimina henter un proyecto di guia duna na hoben cu ta sali for di KIA. Nos a tende e ministro en cuestion anuncia esaki?

Ta di spera cu bin un reflexion adecuado riba e rumbo cu trabao social ta tumando actualmente. Contribucion positivo di e dirigencia nobo lo ta bonbini.

 

LEAVE A REPLY

Please enter your comment!
Please enter your name here