ATA turista bia.jpg

Directora di ATA na Colombia, sra. Maria Victoria Galan a revela cu Aruba ta desea di aumenta cu un 30% e cantidad di turistanan fei di Colombia pa nos isla. Esaki apesar cu e devaluacion di e moneda Colombiano compara cu dollar ta haci mas dificil pa e Colombianonan por biaha pa exterior.

Un factor positivo pa logra e reto di un aumento substancial di un 30% di turista fei e mercado Colombiano, tin di haber cu e eliminacion di e visa pa bin Aruba. E decision aki a drenta na vigor na cuminsamento di luna di december ultimo.

E meta cu sra. Galan a expresa ta di un 30%, ya cu e oferta di cantidad di siya di avion a bira dobel di loke tabata ta tempo cu e visa tabata na vigor. 

Aumento prijs di dollar

Sra. Galan a declara na e corant El Colombiano cu e balor di dollar a afecta pa e turistanan Colombianonan lo por biaha internacionalmente.  Sinembargo apesar cu e balor di dollar ta halto (mas cu 3 mi peso Colombiano pa dollar), e turistanan Colombiano a acepta su balor.

El a indica cu loke nan por a percibi ta cu efectivamente e Colombianonan a frena un poco nan decision di biaha. “Nan no a cancela nan, sino cu nan ta den expectativa di e movemento di e dollar. Awendia y apesar cu e dollar ta sigui halto, e turistanan a acepta su balor…”, el a bisa den un articulo publica dia 22 di januari ultimo.

Aumento mercado y costo  

E ta reconoce cu e meta di un 30% di aumento di turistanan Colombiano pa Aruba ta un meta “bastante ambicioso”. El a laga sa cu e meta aki a surgi debi na e gran oferta di siya di avion. Pero otro aspecto importante tin di haber –segun sra. Galan- cu Aruba ta un destino turistico cu ta conserva vigente den e mercado Colombiano. “E ta un destino desea. E hende ta soña cu bay Aruba… Ainda e hendenan ta bisa:¡Qué delicia ir a Aruba!”, segun directora di ATA-Colombia.

Den su declaracion na El Colombiano, sra. Galan a destaca cu Colombia ta un bon mercado pa Aruba. Encuanto si Aruba ta wordo considera como un di e destino nan mas costoso den Caribe, el a laga sa cu na Aruba tin opcion pa tur presupuesto. Ademas el a argumenta cu den hopi caso e calidad di e servicio ta halto locual ta hustifica e prijs.

El a bisa cu e ofertanan di Aruba ta hopi completo ya cu e turista lo por kies e opcion di “all inclusive”. Tambe nan por scoge e opcion di gewoon hotel cu desayuno inclui so.  “Tin variedad di prijs. E persona ta maneha su presupuesto manera e ta desea. E ta un destino cu ta adapta su mes na e saco di carson di e turista”, segun sra. Galan.  

 

LEAVE A REPLY

Please enter your comment!
Please enter your name here