Diabierna mainta e Weganan Olimpico di Rio 2016 a continua den e compleho di landamento na e Parke Olimpico. Nos atleta di landamento Allyson Ponson a haci su debut Olimpico den e disciplina di mas lihe den e deporte aki cu ta e 50m estilo liber. Guia pa su coach Ismael Santiesteban, Ally a cuminsa na loke semper e tabata soña cune esta landa den un Weganan Olimpico.
Mester bisa cu Allyson a sali bon for di e posicion di salida, unda e la landa consistente y riba un bon velocidad. Na final Allyson ta marca un tempo di 26.00 y ta keda na posicion number 7 den su heat. A lo largo Allyson Ponson ta keda na di 45 luga overall den 88 participante cu 1.77 seconde di e miho marca riba e 50m cu a bini di e landado Blume di Dinamarca cu a marca un tempo di 24.23. Notable ta cu Allyson su miho tempo riba e 50m free ta 25.84, mientras e no a logra supera esaki den e Weganan Olimpico di Rio. No obstante di e esaki no tin duda cu nos lo tende mucho mas di e atleta Allyson Ponson den futuro cercano. Pa mas cu un aña Allyson Ponson a entrena na Aruba bou guia di coach Santiesteban pa e gran dia aki.
