Nicole van der Velden y Thijs Visser tabata un di e duonan di mas hoben den e competencia di Nacra 17 na e Weganan Olimpico di Rio 2016. Es mas pa prome biaha nan ta debuta den e weganan di mas importante riba e planeta aki. Awe diadomingo Nicole y Thijs mester a finalisa den un bon posicion den e tres heat nan nageba pa asina competi atrobe diamars awo pero e biaha aki pa un puesto pa medaya. Nos tin cu bisa cu lamentablemente cosnan no a bay manera ser spera diadomingo pa e duo conoci como Flying Arubies. Combersando cu ambos atleta na final, nan a conta cu e coriente di awa tabata obstaculisa nan tactica, y e biento cu tabata perde forza constantemente. Asina mes e competencia tabata hopi sera, un error chikito y bo tabata perde masha hopi distancia riba e resto di competidornan. Esaki ta loke a pasa cu Nicole y Thijs cu a lo largo a influencia e resultado final. Nan a finalisa dos biaha como number 16 mientras e ultimo heat nan a caba na di 14 lugar. Cu e resultado final aki Nicole y Thijs ta caba na di 16 lugar den e clasificacion general cu 135 punto cu tabata 34 punto leu di e top 10.
Na final di e careda, Nicole y Thijs tabata hopi contento cu nan por a haya e oportunidad di representa Aruba den e Weganan Olimpico di Rio. Ambos a traha duro pa yega Rio, mientras nan a haci historia door di bira Aruba su prome atletanan cu a logra nan clasificacion pa un Weganan Olimpico. Guia pa nan coach Pim Nieuwenhuizen nan tabata satisfecho cu nan logro aki na Rio. Notable ta cu e dos prome lugarnan conkista den race 3 y 6, e duo di Aruba a acapara e atencion mundial, mirando cu e prensa deportivo presente na Rio kier a haya sa mas di nos atletanan como tambe di Aruba. Awe diadomingo despues di e careda, un bes mas e canal di deporte ESPN a bolbe entrevista ambos atleta.
Aruba por ta orguyoso di e dou di Flying Arubies, Nicole van der Velden y Thijs Visser kendenan a sa na representa nos dushi isla cu tur honor den e Weganan Olimpico di Rio 2016. Pabien!!!!
#teamaruba #Rio2016
