Aruba, 18 di augustus 2016. Diaranzon mainta e ultimo atleta di Aruba Monica Pimentel di Taekwondo mira accion den e Weganan Olimpico di Rio 2016. Apoya pa e delegacion di Aruba como tambe su tata y ruman, Monica a cuminsa cu su debut den e Weganan Olimpico contra di e number seis di mundo Yasmina Aziez di Francia.
Mester bisa cu Monica a cuminsa e prome rond cauteloso studiando su contrincante bon. E dos prome rond nan ningun di e dos atletanan no a logra score punto caminda e parti defensivo di ambos tabata sublime. Den e di tres y ultimo rond Aziez di Francia a tuma e iniciativa tempran unda e ta logra score e prome punto, pero ni tres seconde despues Monicata responde bon y empata den punto pa e 1 – 1. Mirando cu Aziez tabata tin un carchi di advertencia e ventaha tabata pa e atleta Monica Pimentel. Faltando 30 seconde pa e pelea termina un descuido di Monica a pone su contrincante Aziez anota e punto di victoria. Asina Monica ta perde 2 – 1 contra Aziez di Francia kende porcierto ta medayista di brons den e campeonato mundial di taekwondo di 2009. Mester bisa cu apesar di e keda elimina den e prome rond Monica a bringa un tremendo combate mientras e publico a aplaudi e atleta Arubano. Den e ultimo seconde nan den e di tres rond, Monica a purba na busca e punto di empate cu diferente tecnica cu skop y mokete na curpa pero no ta logra esaki y ta cay venci.
Notable ta cu Monica por a sigui bringa den e Weganan Olimpico di Rio, esaki den repechahe pero su contrincante Aziez mester a yega e final prome, pero den e semi-final Aziez ta perde 1 – 0 den e ultimo seconde contra di Kim di Sur Korea y elimina Monica pa su pelea den repechahe.
Un pabien sigur na Monica Pimentel cu a demostra cu e por midi su mes contra di e grandinan den e deporte mundial.
