E paradox mientras coronavirus ta empeora desigualdad financiero y di salud y ta empeora pobresa di cuminda: algun hende ta comiendo mas, pero den hopi forma, e ta menos. Si no aborda e aumento global di comemento no saludabel y obesidad, costonan di cuido di salud lo ta mas di $1.3 triyon pa aña den proximo decada, segun Nacionnan Uni ta adverti.

No ta un secreto cu e cuminda mas barata den mundo occidental ta loke ta pio pa bo: cuminda rapido y ultra-procesa, usualmente yena di salo, sucu y vet. Pa esnan mas pober, ta tipicamente loke nan por paga, y esey solamente a bira pio durante pandemia di coronavirus.

Dietanan no saludabel ta spera di empeora e problema di obesidad rond mundo, contribuyendo na ‘su propio pandemia global’ segun Organisacion di Cuminda y Agricultura di Nacionnan Uni a bisa na juli. Cuminda saludabel y nutriente ya ta fuera di alcance pa mas di 3 biyon persona. Cu economianan cayendo y desempleo na nivelnan historico, miyones di persona lo haya nan mes purbando di balansa nan presupuesto cu e necesidad pa porcionnan vital di fruta, berdura y proteina.

Mientras tanto, banconan di cuminda a reporta un aumento den demanda pa ayudo di emergencia durante pandemia di Covid-19, incluyendo Fundacion Pa Nos Comunidad y Cruz Cora na Aruba.

Pero e situacion, obviamente, ta relativo. ONU ta calcula cu alrededor di 132 miyon persona por wordo lansa den pobresa cronico pa fin di aña, pa motibo di e consecuencianan di e pandemia. Den mundo desaroya, sinembargo, obesidad ta un menasa mas grandi cu hambruna.

Globalmente, tin awo mas hende obeso y cu sobrepeso cu hende cu hamber, cu Merca cerca di e top di e lista. Cifranan di obesidad den algun di e paisnan mas rico ta ainda dobel, of tin biaha hasta mas, cu esunnan den paisnan mas pober, hasta mientras paisnan den desaroyo ta catch up, mientras cuminda procesa estilo occidental ta mas accesibel.

Mientras e impulso pa obesidad ta compleho – for di ambiente te educacion – entrada ta un factor vital, y peso di un persona por ta un di e señalnan mas fuerte di desigualdad di cuminda. Esnan cu menos entrada, y hopi minoria etnico, tin chens mas halto di tin sobrepeso cu esnan bibando den areanan mas rico. Pa momento cu nan cumpli 11 aña di edad, muchanan di areanan mas pober na Reino Uni tin probabilidad 3 biaha mas grandi di ta obeso cu nan compañeronan mas rico, y minorianan color scur ta den mayor riesgo.

E implicacionnan pa salud ta cla: hende cu sobrepeso of obeso ta vulnerabel na malesanan manera diabetes, malesa cardiaco, atake celebral y cancer. Investigacion tambe a mustra cu nan tin mayor riesgo di sufri casonan mas severo di Covid-19, y morto.

National Food Strategy, un revision independiente di sistema di cuminda Britanico comisiona pa gobierno, a haya cu adultonan vulnerabel ta come un porcion di fruta y berdura menos pa dia durante lockdown di coronavirus compara cu e poblacion en general. Alrededor di 12% di adulto bibando cu mucha a reporta di laga un cuminda pa dia pasobra no por a paga of haya acceso na cuminda den ultimo seis luna. E situacion mundialmente por empeora mientras mas hende ta perde nan trabou y mester depende riba ayudo social.
Y mientras hende rico ta saboreando pan artesanal, tin algun hende pa ken strawberry y druif ta keda considera un luho. E segundo ola di coronavirus ta empeora e situacion.

 

LEAVE A REPLY

Please enter your comment!
Please enter your name here