Huyendo for di patruyanan di Forsa Arma, crusando riunan, desafiando temperatura halto di Los Andes, wantando hamber y sin placa den nan tas, centenares di Venezolano dia pa dia ta pasa e frontera pa bay bek Colombia pa busca un miho futuro, aunke pandemia Covid-19 ta sigui.

Aunke desde maart ultimo Colombia a cera tur su frontera como parti di e medidanan pa detene e plamamento di e virus, Venezolanonan cu a laga e pais ora e pandemia a cuminsa of prome di esey, nan a inicia e largo y dificil biahe pa bay bek Colombia.

Autoridadnan di Migracion ta calcula cu 115.000 Venezolano a bay bek na nan cas desde april pa via di e pandemia.

Aunke e paso ta cera y tin control di ehercito, polis y autoridadnan di migracion, e frontera di 2.219 kilometer entre Colombia y Venezuela no ta representa un obstaculo mayor pa migrantenan cu ta dicidi regresa, hopi di nan cu nan famia.

“E calculo di Migracion Colombia ta cu 80% di Venezolano cu a sali lo bay drenta bek na teritorio nacional, pero nan lo haci cu un of mas persona”, Juan Francisco Espinosa director di Migracion Colombia a bisa.

E mayoria di migrantenan di e nacion petrolero ta di manera iregular y hopi di nan ta sobrevivi na ciudadnan como Bogota, Medellin, Cali of Barranquilla bendiendo mangel of pidiendo placa den cayanan, mientras cu otronan ta traha den construccion, restaurantnan of nan ta reparti cuminda cu delivery.

Comandante di segunda division di ehercito, general Marco Evangelista Pinto, a bisa cu na frontera di departamento di Norte di Santander cu Venezuela ta existi solamente 53 paso ilegal, loke ta bira dificil e control di migracion.

Ta espera cu Gobierno di Colombia lo extende e ciere di frontera cu Venezuela cu ta vigente desde haci mas di 7 luna.