Justin Bieber ta kedando sin cuero unda pa pone tattoo – y su esposa Hailey Baldwin ta contento cu esey.
Siguiendo e exito di su serie documental original di 10 episodio, Justin Bieber: Seasons, e cantante di 26 aña di edad a revela un special di 30 minuut riba YouTube diabierna titula Justin Bieber: Next Chapter, durante cual el a splica e nificacion tras di un di su tattoo nobo y ta revela cu e no lo pone mas inkt riba su nek.
“Mi ta kere cu e sumpiña ta simbolisa e momentonan dificil den mi bida. E flor ta asina un representacion di bunitesa”, Bieber ta bisa di e arte di rosa riba su nek, cual el a debuta na september. “Mi ta kere mi no ta bay pone mas tattoo riba mi nek. Esey ta un peticion di Hailey.”
El a continua: “Mi lomba ainda tin espacio, y mi no tin yiu ainda. Pues mi tin pensa di pone nan potret riba mi lomba.”
A pesar cu e kier pa su esposo baha velocidad cu su tattoonan, Baldwin recientemente a pone un tattoo riba su dede den honor di e cantante di ‘Intentions’.
Anteriormente e luna aki, artista di tattoo di celebridadnan Mr. K a comparti un post riba Instagram resaltando e dos tattoo nobo cu el a haci pa e modelo di 23 aña di edad.
Segun Mr. K, e prome tattoo cu e modelo a solicita tabata e palabra ‘beleza’ cu ta nifica ‘bunitesa’ den Portugues riba su nek. Tambe el a pone e letter ‘J’ cu un strea riba su dede den honor di Bieber.
E tattoo romantico di Baldwin a yega dos siman despues cu e pareha a celebra nan prome aniversario di matrimonio. E supermodelo a conmemora e dia special cu potretnan bunita di e boda. “Un aña pasa nos tabatin e miho boda. Mi ta desea cu mi por a biba e dia aki un y otro biaha”, el a skirbi.
