Recientemente, un publicacion di abogado Lincoln D. Gomez den su columna legal, titula “Stop the unlawful inheritance tax collection” a hala hopi atencion den comunidad, ya cu ta hopi a pasa den e confusion aki y a bira victima di e colecta ilegal di impuesto riba herencia.

Den su articulo, Gomez a mustra con casonan di impuesto riba herencia a conduci nos den un caminda cu a culmina den un veredicto decisivo di corte di apelacion, sinembargo, loke a bin despues a laga hopi confusion entre comunidad, mientras autoridadnan di impuesto ta nenga di cumpli cu e veredicto. Esaki a pesar cu a scoge pa no apela e caso den Corte Supremo. Asina mes toch ta persisti den e posicion di colecta impuesto di sucesion despues di aña 2018. Segun Gomez, e decision asombroso aki ta genera preocupacion tocante e aplicacion di husticia y bon gobernacion.

Afl. 2.4 miyon colecta for di impuesto aboli

Den su articulo, Gomez ta nota con a pesar di un veredicto rotundo den corte cu a desmantela e marco legal pa impuesto riba herencia (erfbelasting) desde dia 1 di juli di 2018, autoridadnan di impuesto na Aruba a continua colectando e impuesto aki. Datonan di Banco Central di Aruba, corobora pa fuentenan cu bon conocemento di asuntonan di entrada y impuesto, ta revela algo sorprendente: autoridadnan di impuesto a logra amasa un cantidad asombroso, excediendo Afl. 2.4 miyon den colecta di impuesto desde cu a aboli e impuesto oficialmente na 2018. “Si, bo a lesa esey corectamente – ta colectando e impuesto aki hasta despues di su abolicion oficial,” Gomez ta nota.

“E revelacion aki no ta nada menos cu asombroso, considerando cu e fundamento legal inekivoco di e corte categoricamente ta indica cu evaluacionnan di impuesto riba herencia despues di dia 1 di juli di 2018 ta carece di validez sin legislacion transicional,” Gomez ta continua. Ademas, ta nota cu “entidadnan respeta manera Grant Thornton a comparti e perspectiva aki.” Y ta considera cu e hecho cu autoridadnan di impuesto ta continua buscando e colecta aki, a pesar di e veredicto di corte, ta genera duda etico y legal tocante e accionnan di autoridadnan di impuesto.

Individuonan afecta

E hecho cu autoridadnan di impuesto na Aruba ta insisti continuamente riba colecta impuesto riba herencia despues di dia 1 di juli 2018, claramente desafiando un veredicto di corte, ta genera hopi preocupacion. Gomez ta destaca cu pa cuminsa, e persistencia aki ta reta e propio esencia di estado di derecho y e principio cu tur institucion di gobierno mester respeta y sostene decisionnan legal. Tambe ta mina e autoridad di corte di impuesto, ta pone duda riba e credibilidad di e sistema legal, y ta genera duda tocante e compromiso di gobierno pa cumpli cu ley.

Ademas, Gomez ta nota cu e repercusionnan di e accionnan aki ta bay mas leu cu e caso specifico den corte. Cantidad di heredero na Aruba awo por enfrenta obligacion di impuesto incorectamente, poniendo den riesgo nan stabilidad y bienestar financiero. Esaki ta obligacionnan cu e individuonan, cu no ta na altura di e falta di base legal, por ta sacrificando nan finanzas pa por cumpli cu nan. E situacion aki ta crea un atmosfera di incertidumbre y impredictabilidad cu ta laga ciudadanonan cuestionando si gobierno ta bay honra su determinacionnan legal.

Gomez ta nota cu combersacionnan cu abogado y conseheronan di impuesto, incluyendo esnan prominente, a revela consternacion amplio, cu varios abogado civil contemplando pa hiba e asunto den corte civil como ultimo recurso. E por keda na final na e corte civil pa emiti un orden pa stop e colecta ilegal aki, potencialmente creando un obligacion no desea pa gobierno.

Varios persona a conta Bon Dia Aruba cu en berdad nan mester a paga e impuesto aki despues di dia 1 di juli 2018, y cu nan no tabata na altura cu e cobransa aki tabata ilegal. Por pensa cu mayoria di ciudadano tin e idea cu por confia autoridadnan di impuesto pa conduci nan mes na un manera corecto y cu ta cumpli cu ley, y en berdad e situacion aki ta pone esey den duda.

Intervencion di gobierno ta rekeri
 Gomez ta continua bisando den su articulo cu e revocacion di impuesto riba herencia, sin regulacionnan transicional cu ta compañ’e, tabata un escogencia haci pa cuerpo ehecutivo di gobierno. Parlamento, representando e cuerpo legislativo, a rechasa e ordenansa di impuesto riba herencia y e seccionnan relevante di otro leynan relaciona na impuesto cu tabata haci referencia na ordenansa di impuesto riba herencia. Sin e base legal aki, autoridad di impuesto no por emiti ningun evaluacion di impuesto di sucesion of colecta e impuesto aki. Si ta insisti riba esaki, ta arbitrario y contrario na estado di derecho. Esaki pasobra nos Constitucion, Articulo VII, ta expresa esaki claramente: “Ta recauda impuesto pa virtud di un ordenansa nacional.”

E articulo menciona ta bisa cu por recauda impuesto na Aruba solamente basa riba un ordenansa nacional. Den otro palabra, autoridad legislativo di Aruba mester establece un ley di impuesto prome cu por impone impuesto riba e poblacion. Esaki ta un principio esencial di husticia y transparencia di impuesto, sigurando cu e autoridad pa recauda impuesto ta regula pa ley y no por keda imponi arbitrariamente sin un base legal adecuado, Gomez ta indica, agregando: “Den e situacion aki nos ta observando precisamente kico e arkitectonan di nos Constitucion a busca di preveni.”

Kico mester haci?

Segun articulo di Gomez, expertonan uninamente ta di acuerdo riba e stapnan cu mester tuma. Esaki ta inclui cu autoridad di impuesto mester emiti un declaracion publico prome cu dia 31 di december 2023, declarando cu tur evaluacion emiti despues di dia 1 di juli 2018 tabata eroneo y ta nulo y sin efecto.

Despues di esaki, cualkier pago di impuesto di sucesion haci di bon fe mester keda reverti rapidamente y duna placa back of offset na fabor di e pagado di impuesto, cu tur documento relevante actualisa como consecuencia.

“Mi ta kere cu gobierno ta bay completamente sostene y adheri na e decisionnan di e Corte di Apelacion di Impuesto y sostene e paro necesario aki,” segun Gomez. “E situacion ta exigi intervencion inmediato di gobierno pa drecha e situacion aki. Gobierno ta responsable pa sigura cu estado di derecho ta prevalece y cu ciudadanonan no ta carga cu pesonan financiero indebido. Autoridadnan di Aruba mester tuma medida proactivo pa stop e colecta di impuesto riba herencia despues di 2018 y ofrece alivio na e herederonan afecta.”

Gomez ta conclui cu e persistencia di autoridadnan di impuesto pa colecta impuesto riba herencia desafiando un veredicto di corte ta menasa integridad di e sistema legal. E tin impacto riba cantidad di heredero riba e isla. Gobierno mester interveni rapidamente pa rectifica e situacion aki y sigura cu husticia ta prevalece pa henter comunidad. “Tal bes e ora ey, e memoria di e fayecidonan ta bay ta capaz di sosega na paz.”