Bao guia di Ministerio Publico, Cuerpo Policial di Aruba ta investigando morto fatal di Roque Alvin Thijzen, miho conoci como Roy Thijzen. E persona aki di 52 aña di edad a wordo tira mata den un cas na Seroe Largoweg. E investigacion di su morto ta ketobay andando ‘den full speed’ segun Ministerio Publico ta informa. Tur posibel tip ta wordo investiga actualmente por medio di e team investigativo.
Na interes di e investigacion, polis no por duna ningun informacion ainda tocante e resultadonan.
Si bo persona ta dispone di informaccion cu lo por ta di importancia pa soluciona e caso aki, ta pidi bo pa por fabor tuma contacto urgentemente cu autoridadnan. Entre otro, polis lo kier sa cu ken e victima tabata tin contacto den e ultimo dianan prome cu su morto. Particularmente, den e anochi y mardruga prome cu el a wordo tira. Tambe polis lo kier haya informacion tocante ki sorto di contacto esey tabata ta.
Bo por yaa polis (eventualmente anonimamente) via tiplijn cu number 11141.
Caso
Casi un luna pasa un persona a wordo haya sin bida den un cas na Seroe Largo. Pa 6’or di mainta riab 9 di september un melding a drenta via central cu tin un curpa sin bida na e sitio. Na yegada di patruya a constata cu e persona sin bida tabata tin dos perforacion di bala.E area aki ta conoci pa tin problema. Varios biaha caba polis a haya yamada di tiramento den e bario.
