Un aerolinea di Ucrania cargando 176 persona a crash na Teheran algun ora despues cu Iran a tira un misil contra forsanan di Merca. E avion a crash, lansando candela y pertenencia di pasahero rond di e luga. Tur persona abordo di e avion a fayece.

Ehercito Irani a cuestiona cualkier sugerencia cu un misil por a alcansa e avion. Autoridad di Iran a bisa cu ta sospecha cu un problema mecanico a faya na e Boeing 737 di 3 aña bieu. Tin investigacion andando.

E vuelo di Ukraine International Airlines tabata transporta 167 pasahero y nuebe miembro di tripulacion di varios pais. Minister di relacion exterior di Ucrania, Vadym Prystaiko a bisa cu e victimanan ta inclui 82 Irani, 63 Canades y 11 Ucraniano.

President di Ucrania, Volodymyr Zelenskiy a bay bek Kyiv y a bisa cu tin grupo di experto cu lo bay Teheran pa yuda investiga e accidente. “Nos prioridad ta pa haya sa e berdad y ken ta responsabel di accidente.”

E principal aerolinea mundial a desvia nan vuelo cu ta crusa e medio oriente pa evita peliger memey di e tension escalando entre Merca y Iran. Administracion federal di aviacion di Merca a prohibi algun vuelo di Merca for di algun espacio aereo den golfo Persa, advirtiendo di potencial pa mal calculo y identificacion ekiboca di avion civil.

E avion a sufri un retraso casi un ora pa sali di aeropuerto internacional Imam Khomeini. Nunca a logra subi 8.000 pia, el a crash minuut despues cu el a sali, segun dato di FlightRadar2. Qassem Biniaz, vocero di ministerio di transporte y caminda di Iran a bisa cu lo tin candela den un motor y cu piloto a perde control, segun agencia di noticia IRNA. E informe di noticia no ta splica con autoridad Irani lo sa.

Hassan Razaeifar, hefe di comite di investigacion di accident aereo a bisa cu piloto no por a comunica cu controladonan di transito aereo na Teheran. No a duna mas detaye.

President di Ukraine International Airlines, Yevhen Dykhne a bisa cu esey tabata un di nan miho avion, cu un tripulacion increibel y confiabel. Tambe cu mirando experiencia di e tripulacion, ‘probabilidad di eror ta minimo. Nos no ta ni considerando un chens asina’.

Agencia di noticia Fars a cita general Abolfazl Shekarchi, vocero di forsa Irani nengando cu un misil a tira e avion abou. “E rumor tocante e avion ta completamente falso y ningun experto politico ni militar ta confirma esaki”, el a bisa, agregando cu e rumornan ta ‘guera psicologico’ di e oponentenan di gobierno.

LEAVE A REPLY

Please enter your comment!
Please enter your name here