AVP: ‘Nota di cambio riba presupuesto complementario ta deficit adicional y ficticio’

Richard Arends, Parlamentario (AVP)

Ex consehero di Financia y ex minister di Economia di gobierno anterior, parlamentario Richard Arends (AVP) a comenta riba criticanan expresa riba e tratamento di e presupuesto complementario cu ta wordo trata awe den parlamento.

Sr. Arends a bisa cu despues cu nan a entrega e presupuesto complementario aki na Raad van Advies (RvA) prome cu nan a baha como gobierno, e tabata cumpli cabalmente cu e norma di CAft. Kiermen e tabatin un deficit di 5% of 25 miyon di florin.

Sinembargo fin di siman nan a ricibi un nota di cambio ‘cu ta aumenta e deficit aki cu 130 miyon di florin’ locual nan no ta di acuerdo cu ne. Uzando casi e mesun termino di nan opositornan politico, parlamentario Arends ta indica cu segun nan, e ta un ‘aumento artificial’ y te hasta ‘maniobra’.  Parlamentario Arends a declara cu gobierno anterior a sa di reduci e deficit di 9.4% na 2014 pa 0.5% na 2017.

E ta argumenta cu esaki no ta algo cu nan ta bisa, sino cu e colegio di supervision mes, esta CAft a indica tambe den e ultimo presupuesto cu nan a sa di cumpli cu e normanan. Ademas esaki por wordo verifica publicamente via e website di gobierno, pero tambe riba e website di e organo di supervision di CAft. Pa tal motibo e ta haya cu e suma di 130 miyon cu ta wordo papia  ta un ‘deficit adicional y ficticio’cu ta wordo poni riba e presupuesto 2017, sin cu tin mester.

Parlamentario Arends tambe a reacciona riba e ponencia di e fraccion di MEP, caminda RvA a conseha e gobierno actual pa formula un maneho responsabel pa realisa un financia sostenibel. Segun e ex mandatario di e gobierno anterior, RvA a bisa e mesun cos pa añanan 2015 y 2016 y dia 31 di december gobierno anterior a logra cumpli cu e normanan di CAft.

“Yega na e normanan manera cu nos a haci, nan no a cay fei shelo.” Ex mandatario a expresa cu nan tabata trabou basta intensivo y nada facil pa por logra esaki di parti di e mandatarionan, pero tambe di parti di departamento di Impuesto.

Entradanan
Tambe el a señala cu ta wordo papia di parti di gobierno actual y miembronan di e fraccionnan di e gobierno di coalicion riba 50 miyon di impuesto directo y indirecto cu no a drenta ainda den caha di gobierno. Segun parlamentario Arends, parti di e suma aki mester a drenta dia 15 di december. Mirando e criticanan, nan lo kier ricibi oficialmente e datonan di belasting di luna di november, pa por sigura si berdad tin un caida di impuesto di e magnitud di 50 miyon florin.  Ademas e ta haya cu luna di december ta esun di mas actividad economico y esaki ta wordo refleha den entrada via belasting.

E ta haya cu nan oponentenan politico ta purba di haci manera gobierno anterior no a cumpli cu e normanan di CAft. Esaki ta haci e gobierno actua y a introduci gastonan ficticio y ta kita entradanan cu ta pertenece na aña 2017. Te hasta bin cu un proyecto di renobacion den tempo record pa 30 miyon florin di Bestuurskantoor cu ta un edificio monumental. P’esey e no sa kico CAft ta bay bisa riba e incumplimento di e norma aki cu nan a sa di cumpli cu ne.

Igualmente el a laga sa cu nan tambe tin preguntanan, y un di nan tin di haber si berdad no ta bay drenta mas den caha di gobierno e placa riba e benta di accion di FMSA (Fuel Marketing Supply Aruba). Kiermen si berdaderamente Refineria di Aruba (RdA) no ta interesa mas pa cumpr’e, manera inicialmente tabata nan plan di cumpra e accionnan di e compania ey. Si ta asina nan kier sa kende ta bay cumpr’e?

Na final, sr. Arends  a bisa cu e presupuesto ta consisti di transaccionnan cu por tuma luga den un periodo largo di un aña,  y di cash cu por drenta den un periodo mas cortico. Pero ora ta traha e presupuesto, gobierno tin obligacion di hinca nan den e presupuesto 2017, ya cu e compromiso a wordo haci e aña ey.

 

 

 

You May Also Like

mucha cera den auto

Baby cu mucha chikito laga den auto cera pa mayornan landra

Polis a kiebra bentana di un auto cera pa asina por saca un baby di algun ...

‘Koper ilegal di Venezuela: responsabilidad cerca importadonan y nan broker nan’

Director di departamento di Duana, Roderick Croes, a referi di un riba e denuncia ...

DOW: Lo tuma 4 ora maximo pa inundacion di caya seca bek

Durante un conferencia di prensa Departamento DOW a informa cu proyectonan Green Corridor y ...

Grupo di trahado di Aura casino pendiente cu veredicto

Operador nobo di ex Aura Casino a sinta directamente cu un grupo di trahadonan ...

PPA/UPP a yega e firmanan pa por bay eleccion

Ayera e lista combina di PPA/ UPP a yega e cantidad di firma rekeri ...

Liderazgo nobo na KPMG Dutch Caribbean y na oficina di Aruba

Mientras cu na nivel di Caribe Hulandes a bin cambio den liderazgo den KPMG, ...