Aruba su museonan tambe ta celebrando nan dia hunto cu ICOM, cu ta e comision encarga pa sostene y regula museonan rond di mundo.
Mas cu claro Fundacion Museo Arubano cu su museonan; Museo Historico Arubano, Museo di Industria y Museo Comunitario ta uni nan mes pa tambe conscientisa riba e importancia di un museo den formacion di su comunidad y su identidad. Hopi biaha museonan ta conta e historia di cosnan cu nunca antes a wordo papia, creando contenido cu ta educa riba nos herencia, asina nan ta splica.
Meta principal di e dia aki ta pa conscientisa comunidad riba temanan actual di importancia pa e sobrevivencia di cultura y folklore di un pais. Museonan ta importante pa crea intercambio cultura, enrikeciendo di culturanan y desaroyo mutuo entre organisacion y comunidad cu lo fomenta paz den cada un bishitante.
Tur aña ICOM ta conta cu mas di 145 pais cu ta participa cu e iniciativa aki.
Pa Aruba tambe e ta importante pa cuminsa custumbra comunidad cu actividadnan cu ta duna museo tur su debido atencion, segun e museonan. Pa celebra e dia aki e museonan di Aruba a planea bishita na tur medio di comunicacion gargando e mensahe importante pa conoce bo historia, sea orguyoso di bo raiz pa asina aki bo por identifica bo mes cu e Arubianismo cu lo duna bo balor pa trabounan duro cu nos grandinan a haci; y di e forma aki como persona bo por defini unda bo ta bay den futuro.
Tambe mirando cu educacion ta hunga un rol hopi importante pa e museonan, Museo Historico Arubano y Museo Industrial ta bishitante 4 diferente scol basico y ta hiba museo te den klas. Esaki pa logra siña e generacion nobo kico ta un museo, pakico e ta importante pa nos salvaguardia herencia cultural y hopi importante reglanan clave pa con pa trata cu artefactonan historico paden y pafo di un museo.
