Tur grupo di trahado y nan respectivo sindicato, a acepta e pakete di retiro nobo cu nan dunado di trabou, Citgo Aruba Refinery (CAR) a ofrece diamars ultimo.

E proceso aki a tuma luga na sede di departamento di Mediador di Gobierno, caminda vice presidente interino y general di CAR, Sr. Joe Crawford hunto cu nan abogadonan a reuni cu e representantenan di e trahadonan. CITGO a pone riba e mesa di negociacion un oferta cu -segun informacion no oficial- ta alrededor di 10 miyon dollar, destina pa termina nan relacion di trabou cu e grupo di 70 y pico trahado cu a resta den e refineria y terminal di combustibel na Aruba.

Pakete retiro.
Pa Mediador di Gobierno, Anselmo Pontilius, ainda no por bisa cu e capitulo di CITGO su participacion den historia di Aruba su refineria ta totalmente cera. Ya cu ainda tin varios pregunta cu eventualmente lo sigui surgi, y cu seguramente nan lo haya contesta den transcurso di e proximo dianan.

Pontilius ta kere cu tin dos parti den e ultimo desaroyo cu a bin tumando luga rond di e refineria. E prome tin di haci cu e dunado di trabou CITGO, ta den un posicion pa paga e pakete di retiro cu e trahadonan a demanda for di nan. E ta un pago igual na esun cu nan ex colega a haya na februari 2019, y cu e trahadonan ta dispuesto di acepta compara cu e prome oferta di dia 27 di december ultimo, cu nan a rechasa rotundamente.

Den e reunion cu Mediador tabatin diamars ultimo cu gerencia di CITGO, nan a informa cu e biaha aki nan a bin cu un suma di placa adicional pa ofrece na e trahadonan. Pontilius a compronde cu e partidonan, den todo caso, FTA y IOWUA kier a regla e parti aki di e pakete di retiro. Aworaki nan mester haya un recalculacion di loke ta e pago final. Ya cu na momento cu un trahado ta haya su pago final, esey ta nifica cu su relacion di trabou ta termina cu CAR.

Abastecemento di combustibel.
Pero di otro banda tin e parti di refineria y almacenahe di e crudo, y esun di e terminal di combustibel cu ta drenta pa abastece nos isla regularmente. E ta un trabou permanente cu ta tumando luga. “E ta un trabou cu no por para. Pues no ta asina cu bo ta bisa mañan mainta a paga tur e 70 trahado, y despues nos ta bay wak. No!,” el a declara.

Den e parti aki e sindicatonan, muy specialmente FTA, ta bin pidiendo mas claridad. No solamente pa loke ta trata continuidad di empleo, pero tambe riba continuidad di e operacion pa sigui abastece pais di Aruba di combustibel.

E parti aki, gobierno pa medio di e compania estatal Refineria di Aruba (RdA), cu ta doño di e propiedad, tin e responsabilidad pa garantisa e continuidad di e suministro di combustibel pa nos pais. Pero ora bo ta papia di continuidad, e pregunta cu ta surgi ta: Kende nan ta sigui traha? Seguramente e trahadonan aki lo sali for di e grupo di trahadonan cu lo haya nan pakete di retiro for di CITGO.

Loke ta claro -te hasta pa e mesun sindicatonan- ta cu no tur trahado lo sigui traha den un operacion minimal. Pero si ta un echo cu tin un operacion cu tin cu continua y cu mester di un grupo di trahado pa garantisa e trabou aki. “Esey ta algo interesante pa sa den e proximo dianan aki,” el a bisa.

Futuro.
Durante e debate entre CITGO y sindicatonan pa loke ta e pakete di retiro di e trahadonan, a wordo treci dilanti un ley cu a pasa na 2013, den cual tin di haci cu e responsabilidad pa e dunado di trabou nobo.

Pontilius a indica cu esaki lo keda un debate ainda den e proximo simannan. Ta asina cu esun cu ta tuma over e operacion aki, tin un responsabilidad cu e grupo di trahado actual, si nan ta bay over. E ta sigur cu tur partner envolvi den esaki lo sa di sali for di esaki. Pero tambe lo surgi otro pregunta, entre nan, e futuro di e refineria mes.

E refineria mes no ta operacional pa varios aña. Mientras cu eventualmente nan lo por haya un of mas operador cu por tuma e tankinan den cual bo por deposita combustibel y e terminal tambe. “Nos a compronde cu RdA lo no asumi e responsabilidad ey, permanente,” el a bisa. Probablemente na inicio, pero seguramente nan lo busca otro operador.

El a referi ora cu Lago a bay na 1985, caminda e compania Mericano, Wikland Oil a tuma e operacion di e tankinan y almacenahe di combustibel. Despues a bin Coastal, Valero y CITGO cu a tuma over e operacion aki.

Na final, Mediador di Gobierno a bisa cu ta interesante pa bay wak aworaki, ki caminda pais Aruba ta bay tuma encuanto e refineria. Den sentido, si pais Aruba lo sigui busca companianan grandi pa sigui cu e pensamento di haci e refineria na San Nicolas, un mehorado of ‘upgrader’ di crudo. Gobierno a yega di bisa cu keto bay tin interes di gruponan cu kier wak e refineria.

Pues e ta haya cu futuro di refineria tambe ta otro gran pregunta. Pero e ta un pregunta cu gobierno, parlamento y otro sector of instancia representativo di nos pais, tin cu bay contesta. Ya sea cu Aruba no lo sigui cu e refineria y ta opta pa keda cu e parti di almacenamento di productonan deriva di petroleo so. Pero e ta un sorto di operacion cu no lo genera hopi placa, manera ora cu un refineria ta den pleno operacion, y tampoco ta genera un cantidad di cupo di trabou, manera un refineria si ta produci.

Pontilius ta considera importante pa nos wak den cual etapa nos a yega den nos pais pa tuma cierto decision, ya cu toch e refineria ta keda hunga un rol como parti di un pilar economico.