AZV no ta cubri pa bo haci chekeo general, hasta si bo ta un persona cu nunca ta haci uzo di servicionan cu AZV ta ofrece. Como cu AZV ta un instancia curativo solamente si tin iregularidad den bo salud dokter por recomenda un chekeo general cual AZV ta cubri.
E asunto cu AZV ta un instancia curativo keto bay ta algo cu hopi den comunidad no por compronde. Particularmente pa motibo cu prevencion ta hopi importante. Lamentabel ta cu na Aruba ta haci hopi poco pa locual ta prevencion den e area di salud y por ripara esaki na e hecho cu un persona saludabel cu ta paga su prima tur luna di AZV, no ta bin na remarca pa haci un chekeo general. Den contacto cu vocero di AZV Solange Tchong el a splica con esaki ta hinca den otro.
“Esaki no ta di awo, pero ta algo cu for di 2001 ora cu AZV a wordo institui, e nunca a wordo institui pa prevencion. E ley ta unicamente pa cuido curativo y bou di esey un chekeo general of tur otro tipo di keurmento medico manera ora cu ta solicita pa trabou of ora cu ta solicita pa un rijbewijs, esakinan standard no ta cay bou di pakete di cobertura di AZV. Un general Checkup generalmente tambe ta bo propio gastonan.”
El a sigui bisa cu locual cu si AZV ta cubri ta ora cu tin un indicacion medico, pues ora cu un hende di berdad ta mustra di tin señalnan of sintomanan cu tin algo, e ora e dokter ta laga bay haci un test. Sra. Tchong a enfatisa cu esaki no ta algo di awo, y no ta na altura si awo diferente hende a cuminsa ripara, pero e ta asina for di 2001 y no tabatin cambio den ley. Incluso specialmente na comienso, informacion a sali hopi cla riba e parti cu no tin e opcion ey. Hopi biaha locual cu ta pasa ta cu nan mester consulta cu nan dokter di cas y a base di kico tin e dokter ta evalua si tin indicacion medico e ora ey lo laga haci e testnan ey. “Pa loke ta trata hendenan cu awo ta cay ariba, kisas ta trata hendenan cu berdad no ta bay dokter y pues no ta na altura di esaki y no a tuma nota di e informacion aki riba website di AZV. Locual ta pasa hopi biaha ta cu pa bo bin den contacto cu AZV generalmente ta ora cu bo bira malo. Pasobra cu mientras cu bo ta saludabel bo no tin necesidad di haci uzo di bo carchi di AZV y mucho menos di bo servicionan.” Gastonan di loke ta un chekeo general ta tarifanan particular di e dokternan of laboratorionan mes, el a termina bisando.
