Conforme e Decreto Nacional di dia 13 di juli 2022, entrante 1 di october proximo e lista positivo di remedinan cubri pa AZV ta conoce cambio. Esaki ta resultado di e asina yama “5 Wave model” cu a keda diseña pa cumpli cu e peticion den reduccion di gastonan di AZV cu 60 miyon florin pa aña.
Kico ta cambia?
E lista di remedi di AZV tin 3 cambio importante:
Un grupo di remedi cu ya no ta wordo produci ta keda elimina di e lista y no tin efecto pa e aseguradonan.
Remedinan cu por wordo cumpra den botica sin receta di dokter, manera paracetamol y Dika, ta keda saca di e lista y e asegurado mes lo tin cu paga esaki.
Cierto remedinan ta keda cubri solamente ora ta cumpli cu e criterianan estableci. Asegurado cu malesanan cronico ta keda ricibi nan remedi. Solamente si resulta cu no ta cumpli na e criterionan estableci, e ora e asegurado lo mester paga pa e remedi aki.
Kico ta bay sosode?
Den e proximo simannan nos dilanti, OE AZV lo duna informacion regularmente y detaya na su aseguradonan, entre otro via FB, website, e AZV app y diferente otro medio.
Ademas, OE AZV lo organisa sesionnan special pa e dunadonan di cuido, den cual lo informa detayadamente di e cambionan. Un invitacion pa e dunadonan di cuido lo sali dentro di poco. Yegando e fecha di introduccion di 1 di oktober, OE AZV lo habri un liñea di telefon special pa aseguradonan cu tin pregunta.
Ban reforma pa garantisa
Cu e cambionan riba e lista di remedi cubri pa AZV, un esfuerso ta keda haci pa trece reforma den AZV pa asina garantisa cu den futuro AZV por keda brinda su aseguradonan cuido medico accesibel, di calidad y pagabel.
