Banco Central di Aruba (BCA) a caba di actualisa su estimacion y proyeccion previamente calcula pa e producto interno bruto (PIB) pa 2020 y 2021, y ta publica e resultadonan nobo. E publicacion completo yama “Economic Snapshot: The current GDP outlook for Aruba, more than one year into the COVID-19 pandemic” ta disponibel riba nan website (www.cbaruba.org).

Despues di un contraccion di 22.3 porciento den PIB den termino real pa 2020, ta premira cu pa 2021 e actividad economico lo acelera na un tasa mas rapido, basa riba desaroyo economico y data disponibel te cu april 2021. Pa 2021 e PIB, midi den termino real ta anticipa di crece cu 15,5 porciento den e scenario optimista, 12,7 porciento den e “baseline” scenario, y 8,2 porciento den e scenario pesimista.

A pesar di e aumentonan substancial aki, e nivel di actividad economico na 2021 lo keda significantemente bao di esun di 2019. E factor principal contribuyendo na e mehoracion significante den actividad economico den 2021 ta e sector turistico, cual ta anticipa cu e lo sigui recupera fuertemente. E ultimo aki lo ta causa pa un mehoracion den e mercado di biahe di Merca, door di un recuperacion solido den e economia Mericano provoca pa amplio vacunacion y un programa robusto di incentiva di gobierno.

E dos scenario menciona anteriormente ta desvia di e “baseline” scenario den termino di cantidad di bishitante cu ta spera den 2021 y su efecto riba exportacion di servicio, compara cu e nivel na 2019. E scenario optimista ta asumi cu e cantidad di bishitante ta recupera cu 58,0 porciento compara cu e nivel na 2019, e “baseline” scenario 55,0 porciento y e scenario optimista 49,0 porciento.

Notabel si ta cu e gastamento door di turistanan ta anticipa di surpasa nivel di 2019, como cu turistanan ta mustra dispuesto pa gasta mas y ta incuri mas costo relata na test y seguro di COVID-19. E candidad di desempleo basa ariba e recuperacion di turismo ta diferente den cada scenario. E desaroyonan aki den desempleo tin un impacto significante riba consumo. Particularmente, e continuacion di e programa di subsidio di salario di Gobierno di Aruba ta esencial pa mantene empleo y asina consumo priva, si e mercado di labor no recupera suficiente pa yega na nivelnan di empleo di prome cu COVID.

E programa di FASE y uso di cuenta di spaar ta yuda tambe den mantene un cierto nivel di consumo priva.

E cortamento den gasto di gobierno, manera anticipa segun e concepto di e presupuesto 2021 y e restriccion di likides di gobierno, ta mitiga consumo publico y inversion publico. Mientrastanto, inversion priva ta pronostica di baha den 2021, cual tasa di caida ta diferente cu cada scenario.

LEAVE A REPLY

Please enter your comment!
Please enter your name here