Fiscalia social anti-narcotico y crimen organisa di Chile a realisa un operacion contra un banda Colombiano, unda autoridad a tende conversacion riba telefon di persona envolvi.
Autoridad a detene e truck cu tabata transporta e droga, ora cu el a drenta Chile for di ciudad di Arica, den norte di e pais. E vehiculo a ser vigila pa polis di Ecuador y Peru, na momento cu el a sali for di Colombia y tabata bay Santiago, capital di Chile, cu 426 kilogram di marihuana ‘cripy’, scondi den un compartimento secreto di dobel fondo. E balor di e droga ta alrededor di 9 miyon dollar.
Ora cu autoridad a verifica cu e truck tabatin droga, anto forsa di seguridad di Chile a laga e truck bay, cu obhetivo di cu e grupo criminal lo indica unda autoridad por a haya e persona cu tabata di ricibi e carga di droga. Finalmente e plan a funciona y autoridad a yega te na e persona cu tabata wardando riba e carga di droga. Na momento di entrega polis a detene 3 persona di nacionalidad Colombiano, entre nan e lider di banda cu tabata cla pa haci e distribucion di e marihuana.
En total e droga cu a ser confisca tabata 400 paki di marihuana tipo cripy, cu concentracion halto di tetrahidrocannabinol, principal psicoactivo di cannabis. E droga aki ta 5 biaha mas fuerte cu marihuana tradicional, pa tal motibo su balor pa un dosis ta mesun cu cocaina di puresa halto.
