Autoridad Mexicano ta busca un cocodrilo grandi cu diasabra a ataca y a hiba un hoben cu tabata pisca hunto cu otro tres hoben, na un reserva natural na sureste di Mexico.
Personal di Comision nacional di area natural protegi ta busca un cocodrilo di un largura di mas di 3 meter pa por laba su stoma y asina haya sa si e cocodrilo tin resto humano aden. Finalmente a haya e cocodrilo cu diasabra a ataca e grupo di hoben, un fuente di comision nacional di area natural a splica.
“E hobennan tabata pisca ora cu un cocodrilo a ataca nan y a hiba un di nan. E resto di hoben a logra scapa, pa asina yega na e comunidad y solicita auxilio,” e comision a raporta. Tur cuatro hoben tin edad cerca di 18 aña; nan tabata den e reserva di biosfera La Encrucijada, di municipio Acapetahua di Chiapas. Den e lugar ey no tin autorisacion pa actividad di pesca,” e fuente di e comision a splica.
E reserva ey tin un extension di 260 kilometer di largura y den esey tin mas di 42 especie di reptil ta biba.
