Un otro temporada di baseball Little League lo inicia pa nos hoben peloteronan na Aruba ora cu diabierna awor, Aruba Little League inaugura den forma oficial nan temporada di baseball infantil/hubenil cu e ceremonia di apertura den stadion di Nadi Croes/Crismo Angela na Sta Cruz. Esaki e organisacion ta informa den un relato.
“Baseball sin duda ta un di e deportenan mas practica riba nos dushi isla y cada bes ta mira un crecemento den esaki. Un factor cu sin duda a yuda na engrandece e deporte ta e camponan di baseball ofreci pa tur cu kier yuda mira e deporte bay padilanti. Aña pasa tanto e peloteronan profesional firma den exterior como tambe algun instancia priva y e federacion madre ABBA a organisa camponan di baseball pa nos muchanan. Es mas hasta por a mira un baseball camp pa e ser femenino cu por cierto a haya un acohida masha grandi mes di mucha muhenan hoben cu kier siña e deporte aki.
Tur dia nos por mira e terenonan di baseball yena cu mucha y hobennan cu ta entrena nan deporte preferi”, asina e organisacion di Little League ta bisa. “E exito di e ultimo añanan den Little League unda Aruba su hoben peloteronan ta saca cara internacionalmente ta haci cu e interes losigui crece. E anja aki den luna di Juli, Aruba Little League a logra cu e campeonato Latino Americano di junior league lo wordo teni riba nos dushi isla. Ainda ta fresco den nos memoria ora na anja 2010, Aruba a logra e titulo mundial den Senior League na Bangor, Maine, Merca. Mas cu claro nos lo un dia kier yega eynan atrobe, pero nos mester bay traha extra duro pa logra e meta ta anhela.”
