Tin un diferencia di opinion insistente entre gobierno, es decir nos ministro encarga cu economia y financia y e gremionan empresarial tocante e asunto di BBO riba factura si of no. Cada banda tin nan argumentonan pa defende nan posicion, pero realmente nos no ta avansando mucho den e tema aki, mientras ta keda hopi cos sin clarifica. Di banda di e mandatario no a duna realmente te awe un motibo pakico no ta desea mas pa e impuesto aparece riba factura. Y esaki no pasobra nos ta pro, y sigur no fanaticamente, cu e impuesto mester ta riba cada recibo.

Nos por comprende cu e mandatario ta desea di kita e impuesto for di tur recibo. Pa e departamento concerni lo ta hopi mas facil pa no permiti mencion ni cobro riba factura. E ora ta un metodo tin: suma tur benta di un luna y cobra e porcentahe total na e empresario. Reparti esaki entre BBO, BAVP y BAZV por sucede na e departamento mes, punto. Sin embargo, nos no ta haya e argumentacion aki den ningun documento. Por ta cu nos no tin tur documento pero den e diferente ruedanan di prensa cu tabatin desde cu e asunto aki a surgi, nos no ta tende esey treci dilanti tampoco. Recientemente nos por a observa, y a comenta riba esaki tambe, cu tanto e mandatario como e empresarionan ta argumenta cu nan manera di mira e asunto lo contribui na ‘transparencia’.

Cu tur respet, nos no ta mira esey. Nos mester duna e mandatario rason si e ta bisa cu e mero mencion y cobransa di e impuesto riba e prijs di benta no necesariamente ta yuda e cliente yega na mas transparencia, pero nos lo kier hiba e asunto un poco mas leu. Acaso un persona cu cumpra algo ta haya ‘transparencia’ ora e impuesto ta menciona? Impuesto indirecto, cu ademas ta e empresario mester paga riba su benta total di luna, ta solamente un parti chikito di e prijs total cu e cliente ta paga. Nos como consumidor generalmente ta interesa kico e empresario a paga den exterior pa su mercancia, cuanto el a paga na fleta, seguro, invoerrechten? Nos kier sa cuanto el a inclui pa su ‘overhead’ di negoshi? No, toch? Loke nos kier sa ta si e prijs cu e ta pidi pa su producto, ta realistico y rasonabel compara cu loke ta e prijs den exterior. Si e diferencia ta hopi grandi anto nos ta purba di cumpra den exterior, pagando igualmente gasto di transporte, seguro y impuesto di importacion, pero en todo caso nos no ta paga ni overhead, ni ganashi di e negoshi cu ta bende localmente.

Esey ta significa cu masalmente nos ta cuminsa cumpra ‘online’? E parti mas pudiente di nos si; al fin y al cabo, bo mester tin un credit card y esey ta algo cu gran parti di nos poblacion no tin. Nos sa esey tambe pasobra si bo tin uno, bo por spera bishita regularmente di famia cu ta bin puntra bo pa haci nan e fabor di uza bo credit card. Ta keda tambe e consideracion di garantia riba un producto, ademas di e servicio local cu tin o no tin; tur esey tambe pa considera cumpra localmente, aunke e prijsnan ta mas halto den cierto caso.

Sin embargo, banda di e discusion iritante aki, nos ta mira otro fenomeno cu no ta na bentaha di e consumidor. Esey ta e aumento drastico di prijs den varios sector unda hopi biaha nos ta haya di tende e argumento cu aumento di BBO, o un di su yiunan, a haci prijs subi. Ora bo confronta e empresario cu su prijs a subi 10 o 25%, mientras cu e aumento di BBO, etc. tabata solamente 2,5%, di repente e combersacion por bira desagradabel. E ora di biaha ta haya tende argumento cu mester paga mas huur pa e local, pa via di BBO y pasobra e propietario ta bay paga balente mas grondbelasting, etc.

Logico cu nos no por pasa rond cerca tur empresa den e mesun ramo ey pa nos compara prijs a base di loke nan ta conta nos; nos no tin tempo ni gana den e cosnan ey como consumidor. Y ya cu organisacion cu ta boga pa interes di consumidor ta no existente riba e isla aki, ta keda nos un solo remedi: no cumpra, si e prijs ta parce bo hopi exagera. Busca en berdad un persona cu por yuda bo pa cumpra e producto online. Di tur manera, e consumidor no ta scapa di haci algo di investigacion encuanto prijs, sigur si ta trata di articulo di prijs y cu ta rekeri bon mantenimento.

Di tur manera, pa bolbe na e asunto di BBO riba factura, esaki ta parce nos un discusion secundario, cu absolutamente no ta contribui nada pa e consumidor, pasobra nan mester paga en todo caso, cu e ta riba factura of no. A proposito, nos a papia algun dia pasa cu un empresario, cu un tienda cu miles di prijs diferente. El a conta nos cu nunca, desde 2007, el a yega di pone un biaha BBO riba un factura. Aparentemente su clientenan ta aprecia esey y nunca tin discusion. Asina tambe por, ta parce…

 

LEAVE A REPLY

Please enter your comment!
Please enter your name here