E decision a cay y ta den ehecucion caba. A baha tur salario di empleado publico y esnan den sector semi-publico pa promer biaha. Awor ta di spera cu e resto di medida, cu ta concerni e director y empleadonan di empresa y demas entidad liga na gobernacion , tambe tuma lugar. Cu esey tur hende a keda conforme? No, pasobra awor ta bay sigui e consulta interminable tocante con pa bira e asunto di tal forma, cu funcionarionan publico ta saca algo di beneficio for di e situacion aki. Bo no por blame hende pa purba, berdad?

Sin embargo, si nos ta bay haci esey, y gobierno ta obliga di scucha, aunke ta solamente pa mantene paz den aparato gubernamental, ta importante pa considera henter e pakete di beneficio cu tin. Pa cuminsa, den pasado, na momento cu no tabatin manera pa paga cu placa, a introduci e tremendo idea di dia liber extra, e famoso ‘ATV-dagen’. Esey a crece bira un monster di 13 dia pa aña, riba e vakantie regular di e empleado, cu facilmente hunto ta montona na mas di seis siman di ausencia di cada empleado. Esey riba su turno a aumenta e grito pa mas personal pa por yega na un cobertura razonable di trabao. No cu a perde tempo cu haci un analisis loke berdaderamente e departamento tabata mester, den mayoria di caso no, y tanto e departamento como e ministro a keda contento, pasobra asina por a hustifica cu mester a tuma mas hende na trabao. No cu esey a yuda completamente, pasobra regularmente ta pasa cu bo mester atende un asunto na gobierno, y nan ta bisa trankilamente cu ‘fulano o fulana no tey, e ta cu vakantie’, anto ningun hende por take over y abo mester ‘bolbe aki dos siman’. Hasta tin director cu no tin ningun berguensa pa admiti e tipo di ineptitud den prestacion di nan departamento. Loke esaki ta ilustra ademas, ta cu mas hende no a significa mihor servicio, al contrario.

Esey sin embargo no tabata tur. A bin cu e igualmente famoso ‘toelage’ of ‘uitkering’ separa, banda di e vakantie-uitkering, cu a haci cu varios biaha pa aña gobierno ta core cabez di gay pa wak si tin cashflow pa paga e suma miyonario extra aki. Ta di spera cu awor sí nos a yega na final di creatividad pa squeeze mas placa for di comunidad, pasobra pa mayor parti ta esnan den sector priva ta paga tur e regalonan extra aki.

Awor, pa no perde obhetividad for di vista, ta berdad cu na cierto lugar den e aparato tabatin y tin te awe necesidad di mas capacidad di operacion. Pero necesidad di mas capacidad no automaticamente significa emplea mas hende, pasobra promer cu tur cos mester analisa si no tin otro manera di organisa trabao. Den esaki e famoso ‘e-government’ por hunga un papel importante, pero si bo no sa kico bo ta bay reorganisa y con, anto bo no por avansa cu e plannan aki, cu te awe nos a mira solamente den presentacion di PowerPoint masha bunita. Pues lo ta bon pa bay haci e trabao duro ey y despues bolbe pa nos sigui papia.

Asina nos a ‘end up’ cu un gobernacion cu ta responsable pa paga mas di 8.000 salario pa luna, cualnan tur ta cay bao di e actual medida di reduccion di salario. Y, cu esey, awor nos a keda cla? Pa bisa berdad, no. Y pakico no? Pasobra ainda nos ta pagando demasiado placa pa haya servicio menos cu mediocre na hopi departamento, unda ainda e ciudadano ta haya un trato como sifuera ta nos tey pa sirbi nan, y no lo contrario.

Gobierno por hinca hopi habladera den su structura di consulta, pero realmente no mester tanto genio pa mehora cos. E problema ta cu falta e voluntad pa cambia algo. Y e voluntad pa cambia algo ta liga na e hecho cu corupcion no ta bay bon cu proceso administrativo limpi y transparente. Y ta esey ta falta na grandi den nos aparato. “In troebel water is het goed vissen’ e Hulandesnan ta bisa, y nos no a topa practicamente nunca un politico cu ta tribi admiti cu ta esaki ta e problema. Y asina nos ta keda sinta cu un aparato yen di hende inutil cu ta stroba e poco bonnan di traha. Pasobra, pa nos ta honesto, aparato gubernamental ta funciona un tiki ainda danki na esnan cu si ta lanta di nan cama tur dia y bay haci nan trabao manera mester ta. Ningun parti di nos analisis negativo aki ta dirigi na nan, al contrario.

Sin embargo, si algun dia nos kier yega na un aparato gubernamental drechi, cu pago drechi pa tur, sin mester hunga cu toelage ex artikel 25 pa esnan pega riba e ministronan, y otro privilegio dudoso, tin hopi mas cu mester sucede cu loke gobierno tin pensa cu e restructuracion cu Hulanda ta forza nan aden. Ta importante pa nos por bolbe na un structura di pago normal den gobernacion. Esey lo ta e beneficio tambe di e ambtenaar bon, cu awor ta sufri di e consecuencianan di corupcion y clientelismo politico. Trabao no ta placa so.

 

LEAVE A REPLY

Please enter your comment!
Please enter your name here