Na momento cu stevia a yega mercado Mericano na aña 2008, hopi den comunidad di nutricion tabata encanta tocante e salud potencial di e substituto di sucu nobo aki.

Finalmente tabatin un substituto di sucu ‘natural’ cu cero caloria cu tabata hasta 300 biaha mas zoet cu sucu. E speransa tabata cu stevia lo yuda esfuersonan pa baha peso sin mester sacrifica sabor, y lo hunga un rol den maneho di diabetes. De hecho, algo di esaki a bira realidad.

Stevia ta continua popular, y hopi di esaki por ta relaciona cu e aumento di diabetes como tambe e locura pa cuminda natural, basa riba mata (‘plant-based’). Mientras uso di otro endulcorante artificial a disminui, benta di productonan conteniendo stevia a aumenta 16% di 2017 pa 2018, segun un encuesta Nielsen.

Kico ta stevia?
Deriva di e mata Sur Americano Stevia rebaudiana, e substituto di sucu aki tambe ta conoci como rebaudioside A, reb-A of rebian. E mata ta contene glycoside steviol, cual ta ser usa como endulcorante. Marcanan di stevia ta inclui PureVia, Truvia y SweetLeafSweetener. Por haya stevia den bebida, postre, bals, bolo, mangel, yoghurt y paketenan pa usa den bebida, y tambe por usa pa horna cuminda na cas.

Stevia ta safe?
Stevia ta considera un ingrediente ‘generalmente reconoci como safe’ (GRAS) pa FDA na Merca. Esaki no ta aplica na e blachi di stevia y extractonan curu di stevia, cual no tin aprobacion di FDA pa su uso den cuminda.

Tabatin algun preocupacion inicialmente, cu stevia por aumenta e riesgo di cancer of problemanan reproductivo basa riba estudionan animal; e grupo di vigilante Centro pa Ciencia den Interes Publico (CSPI) a lidera e accion pa FDA wanta e status GRAS. Pero awo, despues di mas di dies aña den mercado, stevia ta safe hasta den standard di CSPI, maske e grupo ainda kier haci mas test pa establece su seguridad.

Potencial beneficio pa salud
Controla nivel di sucu den sanger ta e base di maneho di diabetes, y algun cuminda tin efectonan mas dramatico pa cu esaki cu otronan. Stevia no ta eleva nivel di sucu den sanger, segun Leah Kaufman, MS, dietista registra y educador certifica pa diabetes den programa di maneho di peso na NYU Langone den ciudad di New York. “Stevia lo ta un alternativa bon y sigur pa sucu pa pashent di diabetes”, el a bisa.

Hasta tin evidencia cu ta sugeri cu stevia por tin beneficio mas leu di loke ta spera di djis reduci consumo di sucu. Den un estudio na 2017 den Nature Communications, investigadonan na Universidad di Leuven na Belgica a mustra cu stevia na stimula un proteina cu ta esencial pa percepcion di sabor, y ta involucra den liberacion di insulina despues di un cuminda. E hormona insulina ta produci pa e pancreas pa regula sucu den sanger.

Asociacion Mericano di Diabetes y Asociacion Mericano di Curason ta di acuerdo cu stevia por tin beneficio pa persona cu diabetes si nan us’e den moderacion y no pa compensa door di come calorianan extra despues. Autoridad Europeo di Seguridad di Cuminda, y e Comite riba Aditivo di Cuminda conhunto di Organisacion di Cuminda y Agricultura y Organisacion Mundial di Salud (WHO) a establece un consumo diario aceptabel di no mas di 12mg pa dia, cual ta ekivalente na 40 paki pa un persona cu peso di 150 libra, Kaufman a bisa.

Stevia ta un bon substituto pa sucrose ya cu tin cero caloria. “Esnan cu ta buscando pa substitui sucu cu stevia por beneficia di e alternativa aki; sinembargo, no ta garantisa perdida di peso”, Kaufman ta bisa.

De hecho, sikiera un estudio chikito na 2016 a mustra cu ora participantenan tabata bebe un bebida cu stevia na luga di sucu mainta, nan tabata compensa door di come mas den lunch.

Segun David Levitsky, PhD, profesor di division di ciencia nutricional na Cornell University, en berdad lo consumi menos caloria si usa stevia na luga di sucu. “Teoriticamente esaki por conduci na perdida di peso a traves di tempo, pero ta dificil pa mustra esaki den estudio. Pa baha peso, esaki ta un mecanismo pa usa, pero no ta bay pone bo perde 100 libra. Reduccion di vet, monitor tamaño di porcion, y come solamente ora bo tin hamber, ta hopi mas efectivo cu substitui sucu cu stevia, pa baha peso.”

Stevia ta smaak manera sucu? No exactamente, e ta nota. “Bo nunca lo haya un substituto di sucu cu ta smaak exactamente manera sucu.” Stevia ta deriva di un mata, cual ta mira como un beneficio pa hopi hende cu ta prefera di come cumindanan natural, e ta bisa. Pasobra e ta asina zoet, no mester usa hopi, pues hopi biaha ta mix stevia cu un agente ‘carrier’ manera erythritol of dexterose (sucu di maishi) cu tambe ta dun’e un apariencia y textura mas similar na sucu.

“E stevia cu bo ta cumpra den tienda por ta mescla cu Reb-A of erythritol, un alcohol di sucu, cu por tin efectonan gastrointestinal negativo y causa problema digestivo cerca algun hende”, Kaufman ta adverti. Alcohol di sucu ta haya den hopi bals y mangel sin sucu (no necesariamente hunto cu stevia) y come demasiado di nan por causa diarea.

E ta recomenda pa sigura cu bo sa exactamente kico tin den bo substituto di sucu.

LEAVE A REPLY

Please enter your comment!
Please enter your name here