Tres hacker Hulandes a hack cuenta di Twitter di Donald Trump poco prome cu el a converti den presidente na aña 2016, adivinando cu su password tabata ‘yourefired’, segun revista Vrij Nederland a reporta.

E hackernan, identifica pa e revista como Edwin, Mattijs y Victor, a usa un lista cu a leak di cuentanan di LinkedIn pa ataca Trump, e tempo aya un candidato presidencial, y despues adverti’e den un e-mail cu nan a hack e.

Periodista di Vrij Nederland, Gerard Janssen, a entrevista e tres hacker y a publica un reporte di e hack despues di conoce nan na un convencion di hacker. Screenshotnan ta mustra cu nan tabata miembro di un grupo di hacker cu tabata yama nan mes ‘Guild of the Grumpy Old Hackers’, y cu nan a hack cuenta di Trump dia 27 di october 2016, poco prome cu e voto presidencial.

Nan a tuma e passwordo di e base di dato di LinkedIn cu a leak, cual tabata contene 117 miyon nomber y password. ‘You’re fired’ tabata un frase popular di Trump den su rol den show di television The Apprentice. “Nan tabata den shock pa nan exito”, Janssen a bisa NOS news. “Nan tabata sa cu nan por haya nan mes den problema pasobra por mira e acto como un atake cibernetico riba un candidato presidencial.”

E hackernan, kende a documenta nan actonan exhaustivamente, nunca a tende di Trump mes, pero e Centro Nacional di Seguridad Cibernetico (NCSC) a contesta nan na november 2016, gradiciendo nan pa tuma contacto.

Tur tres, kende awo ta traha den seguridad online purbando di detecta debilidadnan den software corporativo y di gobierno, tambe a bishita Merca sin problema. Donald Trump no tabata riba un lista di nomber famoso, incluyendo Bill Gates, Elon Musk, Apple, Joe Biden y Barack Obama, kende nan cuenta di Twitter a bira victima di hacking juli ultimo.

LEAVE A REPLY

Please enter your comment!
Please enter your name here