Durante di e fin di siman PPA a analisa e reunion di parlamento di diahuebs dia 6 di juni 2019 y e documentacion relaciona cu esaki  y nos a yega e siguiente conclusion: E amienda di e 12 miembro di Parlamento di coalicion ta nada otro cu un mocion di desconfianza contra nan propio gobierno y como tal gobierno mester a  retira diahuebs anochi of diabierna ultimo durante dia……gobierno a cay pero ta nenga di bay.

PPA kier declara cu for di 2015 PPA ta di opinion cu e introduccion di e ley di LAft door di gobierno di AVP a trapa nos autonomia financiero cual Aruba tin desde 1954 y p’esey tambe na 2015 PPA a forma parti di esunnan cu a marcha y protesta contra introduccion di LAft  y esey ta nos posicion te awe.

Kico a conduci cu 12 miembro di Parlamento a sinti e necesidad di entrega un amienda riba e concepto di ley cu nan propio gobierno a entrega na parlamento?

***  Dia 4 di September 2019 parlamento di Aruba a pasa un mocion  den cual Parlamento a pidi gobierno di Aruba pa trece e cambionan den e Ley di LAft  pa prolonga e tarea di LAft pero pa kita tur locual ta necesario pa elimina locual ta en pugna na nos Staatsregeling di Aruba y na Statuut pa Reino Hulandes.

Gabinete Wever Croes a entrega un concepto di Ley fecha 7 di mei na Parlamento di Aruba firma pa prome minister Evelyn Wever Croes, ministernan di finanzas Xiomara  Ruiz Maduro y husticia Andin Bikker.

Raad van Advies a duna como su conclusion cu e concepto di ley no tabata cumpli cu e  mocion di Parlamento di fecha 4 di September 2018 y NO tabata propone ningun cambio cu lo a kita e aspectonan cu lo ta anticonstitucional conforme e Staatsregeling di Aruba y e Statuut pa Reino Hulandes!

Gobierno Wever Croes den su contesta riba e conseho di Raad van Advies firma pa minister Bikker den nomber di e tres firmante a mantene e posicion di gobierno cu no ta necesario pa bin cu ningun cambio awo pero ta laga esaki pa den futuro.

Den e amienda ta para lo siguiente firma pa e parlamentarionan di coalicion, traduci for di Hulandes “Cu e ultimo conseho entrega pa Raad van Advies (RvA 221-18) riba e LAft Raad van Advies ta conclui cu e concepto no ta cumpli cu e deseo di parlamento pa rectifica e faltanan constitucional y e erornan constata anteriormente y como tal e concepto di gobierno ta mantene e erornan aki den e LAft.

Basa riba locual ta indica aki riba y e legitimidad di e estado di derecho Arubano e amienda di e firmantenan tin como meta pa rectifica e erornan y conflictonan Constitucional cu Statuut di Reino Hulandes.”

Y basa riba esaki e firmantenan a propone e cambionan menciona den e amienda cu nan a entrega pasobra gobierno su concepto no ta cumpli cu locual nan parlamento a pidi den su mocion di 4 di september 2018.

Basa riba esaki PPA no tin otro forma pa mira cu e amienda ta un mocion di desconfianza directo riba e concepto di ley cu gobierno Wever-Croes a entrega y hasta ora Raad van Advies a duna su prome remarcanan gobierno Wever-Croes a mantene su concepto y a conseha parlamento pa aproba su concepto di ley y laga locual RvA ta menciona pa futuro.

No tin otro forma pa conclui cu e amienda ta un mocion di desconfiansa pa gabinete Wever Croes.

Diahuebs 6 di juni 2019 berdaderamente tabata un dia historico unda 12 miembro di parlamento a baha nan propio gobierno. E coalicion entre MEP-POR-RED constitucionalmente y oficialmente a cay pero nan no kier bay! Ta haci manera nan nanishi  ta sangra, pero esaki ta e realidad politico.

Pa colmo mientras gobierno ta haci manera su nanishi ta sangra y cu lo no tin motibo pa saca conclusion cu ministro presidente Evelyn Wever Croes ta declara cu pa mantene e paz y trankilidad entre Aruba y Hulanda lo mester respeta e contenido di e protocol di november 2018 esaki ta un ridiculez pasobra Parlamento y su mayoria a pasa un ley cu lo mester mucho mas balor cu e protocol pero asina mes despues cu parlamento a pasa su amienda den stoma di gobierno ministro presidente ta declara algo asina.

No tin duda cu coalicion ta haciendo su maximo esfuerso cu mientras tabatin un reunion cu nan a cualifica como un ‘reunion historico’ esaki tabata memey di diferencianan enorme entre gobierno y nan propio coalicion. Manera PPA a declara gabinete Wever-Croes A cay pero nan ta nenga di bay!

Pa locual ta trata reaccion di gobierno di Reino Hulandes pa cu e desaroyo unda e amienda a menciona nos ta keda pendiente manera tur otro!

 

LEAVE A REPLY

Please enter your comment!
Please enter your name here