Mañan diabierna 22 di april Biblioteca Nacional Aruba ta organisa e di 10 edicion di Simposio Educativo di Sostenibilidad. E tema principal pa e simposio aki lo ta economia circular, caminda lo tin diferente orador local y internacional, experto den e tema di economia circular, cu lo brinda tur informacion na comunidad di Aruba.
Na e conferencia di prensa tabata presente un di e oradornan local di e simposio, Dylan Farro, ken ta un Statistical Analyst na Banco Central di Aruba y actualmente ta finalisando su maestria den data analytics.
Farro a splica cu titulo di su presentacion pa e simposio lo ta “Exploring Consumers Circular Economic Behavior”, cu segun el a indica ta e prome investigacion di su tipo unda cu riba un manera cuantitativo a investiga kico ta motiva economia circular na Aruba.
El a remarca cu no solamente na Aruba, pero mundialmente, tin un escasez di data ariba e tereno di economia circular. E falta di data aki ta un problema pasobra expertonan no por determina necesariamente unda un pais ta, y consecuentemente nan no sa con pa yega caminda cu mester bay.
E investigacion cu el a realisa, Farro a sigui informa, ta purba di crea un brug na un nivel di consumidor. Tin diferente nivel den esaki, tin e consumidor, e persona cu ta bende e producto mes, esun cu ta traha e producto, esnan cu ta goberna e pais, tin e companianan grandi tambe y tur ta hunga un papel hopi importante. E investigacion aki ta solamente un pida chikito di e puzzel.
Hopi persona ta haci e pregunta con por cambia e mundo pa miho? Farro ta subraya cu pa esaki pasa cada persona mester cuminsa na su mes, y e investigacion aki ta midi loke ta motiva economia circular na Aruba cu e consumidornan. “E ta midi kico ta e balornan cu tin un impacto na esaki, kico ta motiva na pa haci esaki, kico ta nan intencion y con nan ta yega na e adapta na e modelo di economia circular”, el a splica.
“Mi papel como ciudadano Arubiano cu ta studiando data, mi meta ta pa yuda yena e buraco aki cu asina nos por tuma decisionnan pa bienestar di e pais aki usando data factibel y datonan cu nos reproduci diferente biaha pa confirma tambe cu asina e ta y si nos a bay mas dilanti of mas atras”, Farro a agrega.
Invitado special y keynote speaker di e conferencia di e simposio educativo, Manuel Maqueda ta un special program instructor na Universidad di Harvard den e tema di economia circular. Maqueda tin alrededor di 12 aña di experiencia eherciendo economia circular y ta specialisa den contaminacion di plastic.
El a splica durante e conferencia di prensa cu el a cuminsa papia di e topico aki na aña 2008 ora cu e no tabata hopi conoci y el a cuminsa algun organisacionnan notabel cu ta purba stop polucion di plastic. El a crea tambe e “Online Circular Economy Program” pa e Universidad di California, Berkely y despues el a cuminsa siña e topico ey na e Universidad di Harvard.
E ta un miembro tambe di e Circular Economy Alliance. Maqueda a describi su mes como un persona cu gusta haci y carga iniciativanan mundialmente. E ta un orador mundialmente reconoci y ta wordo invita tambe rond di mundo pa brinda informacion ariba e tema di economia circular. Recientemente el a papia na e Islanan Canarias.
El a splica cu islanan ta camindanan cu economia circular ta esencial, pero kico en realidad ta economia circular. E definicion mas facil cu Maqueda a duna ta cu economia circular ta e unico economia posibel na un isla pasobra mester mantene tur cos den uso mas largo cu por, drecha tur cos y crea un economia cu ta resiliente ariba recursonan local. Esey ta enfoca mas ariba e trabao cu ariba e productonan cu ta bin di afo.
“E ta un economia cu ta elimina toxicidad, ta elimina desperdicio, pasobra si no como un isla bo ta ricibi productonan for di afo, bo bay ta hoga den e desperdicio y bo ta desgasta bo propio recursonan, specialmente ora bo ta depende di turismo”, el a agrega.
Economia circular, manera Maqueda a informa, ta funciona manera naturalesa, e ta crea balor y e ta keda regenera e recursonan tur ora. E ta un economia tambe cu ta mas inclusivo pasobra e ta depende ariba actividadnan local y no di cosnan cu ta pasa afo. “Mi ta hopi contento di t’ey ‘kinan y papia mas di economia circular”, el a expresa.
Funcionario di Biblioteca Nacional Aruba y coordinador di Simposio Educativo di Sostenibilidad, Ronnie Alders, a subraya cu e simposio aki ta specialmente dirigi na scolnan secundario y educacion avansa. E ultimo dos añanan naturalmente no tabatin un simposio grandi manera tabata custuma tur aña pa motibo di e pandemia, pero asina mes, Alders a remarca, Biblioteca Nacional Aruba no a stop di traha pa prepara pa e simposio aki
Alders a menciona tambe cu pa prome biaha den historia e siman di simposio lo tuma luga na San Nicolas, na e filial di Biblioteca Nacional Aruba y na mesun momento e filial lo ricibi mas atencion ariba e parti di educacion di sostenibilidad.
Segun el a indica, e scolnan pariba di brug a reacciona hopi positivo na e noticia aki y diferente scolnan lo ta participando den e siman di simposio educativo di sostenibilidad cu lo tuma luga cuater dia, 25, 26, 28 y 29 di april caminda lo tin oradornan profesional riba nan tereno ariba e diferente dianan pa informa e studiantenan kico ta circular economy.
“Esaki ta e oportunidad unda cu e futuro di Aruba lo ricibi tur e informacion necesario tocante sostenibilidad y circular economy”, el a enfatisa.
Lo tin tambe presencia di Minister di Asuntonan Economico, Comunicacion y Desaroyo Sostenibel, Geoffrey Wever como un di e oradornan y Minister di Enseñansa y Deporte, Endy Croes lo habri e conferencia. Otro oradornan ta inclui Sr. Grerory Fung A Fat y Sr. James Ocalia, dos experto den nan ramo cu hopi experiencia.
Por ultimo, director di Biblioteca Nacional, Astrid Britten, a extende e invitacion na comunidad di Aruba pa atende na e conferencia y apertura di siman di e simposio educativo di sostenibilidad pa asina siña mas di e tema di economia circular.
