Den cuadro di CAft su bishita, unda minister di husticia Andin Bikker (POR) ayera lo a purba splica dicon un prizon nobo ta necesario pa Aruba, e minister a ilustra con e gobierno cu mando di 2009 pa 2017 di AVP no a tuma niun accion pa remedia e situacion na KIA, mientras e como mandatario ta enfoca riba traha un KIA nobo.

Durante un conferencia di prensa ayera mainta, minister di husticia a trece dilanti cu Comision Europeo pa Prevencion di Tortura y Trato Inhumano (CPT) den mei di 2014 a duna un conseho na autoridadnan di Aruba pa drecha e estado di e facilidad coreccional na Aruba. Asina minister Bikker lo kier ilustra cu e gobierno anterior, y particularmente e ex mandatario di husticia Arthur Dowers (AVP) actualmente den parlamento, no a haci su trabou. “CPT a bisa bo cu bo no a haci nada y nunca mi a tende cu el a bisa cu e ta bay construi un KIA nobo”.

E problema cu awo ta sinta cu ne, segun Bikker, ta cu awo mester bay convence CAft dicon un KIA nobo ta necesario, ‘mientras CAft tin sospecho logico cu lo bay haci algo otro cu e proyecto, manera un PPP cual ta loke e gobierno anterior a haci’.

Tipo di bono cu no ta bira debe.
Pa bay contra e modo di operacion aki, Bikker a indica cu a manda un carta na CAft unda ta delinea cu pa e proyecto di bin cu un KIA nobo, lo bay haci uzo di ‘perpetual bonds’, cual ta un tipo di bono cu no ta genera debe. E tipo di bono aki no ta caduca, y ta funciona manera pago riba accionnan di dividend. “Nos a propone e concepto aki, cu Hulanda ta uzando desde siglo 17 caba”, Bikker a bisa. Sinembargo e mandatario ta habri pa cualkier otro solucion, asina el a indica den su carta na CAft.

No a haci nada cu tema di abuso di menor.
E mandatario a bay bek den e critica pa e mandatario anterior, bisando cu su (red: Dowers) propio fraccion, den forma di un comision special den 2016 a critica cu na e momento ey no a tuma ningun stap pa adresa e problema di abuso di menor den comunidad. “Den 2010 mes a bin un rapport cu recomendacionnan, unda a recomenda pa hisa e castigo pa delitonan di indole sexual contra menor y tambe pa kita e caducacion di e delito. Den 2016 Mervin Wyatt Ras y Desiree De Sousa Croes — su propio fraccion — ta constata cu e recomendacionnan duna pa e comision special den 2010 mayormente Dowers no a ehecuta. Den 2016, no ta Andin Bikker a bisa”.

Bikker a mustra cu ya caba nan ta mandando un concepto di ley pa hisa e castigo pa e delitonan aki. Interesante pa menciona ta cu e mandatario a indica cu e castigonan pa e delitonan aki na Aruba ta esun mas abou den Reino, kiermen cu na Corsou, Sint Maarten y Hulanda castigonan ta mas halto.

LEAVE A REPLY

Please enter your comment!
Please enter your name here