Na ultimo ora a keda cancela e bishita di un delegacion diplomatico di Colombia, encabesa pa su Vice Minister di Relacion Exterior, Patti Londoño Jaramillo. E bishita oficial aki tabata programa pa ayera; pero el a keda cancela y no tin un fecha nobo estableci. Asina un fuente diplomatico a informa na Bon Dia Aruba
E tabata e prome reunion diplomatico di e caliber aki despues cu un par di aña pasa a keda firma un acuerdo di entendimento (MoU), entre e gobierno central di Colombia y Aruba. E meta di e bishita aki tabata esun di duna dinamismo na e MoU aki. P’esey ademas di Vice Minister Londoño Jaramillo, igualmente Director di e seccion di Europa di Ministerio di Relacion Exterior di Colombia, Juan Guillemo Castro, hunto cu Gobernador di Guajira, Weilder Guerra tabata forma parti di e delegacion diplomatico aki.
Gobernador di Guajira
Di otro banda, director di Fundacion Rancho, Clifford Rosa kende a haci esfuersonan pa promove e lasonan comercial y cultural entre Aruba y e region Colombiano di Guajira a laga sa cu pa luna di juni eventualmente e Gobernador di Guajira lo bishita Aruba. Sr. Guerra kende ta un Antropologo lo desea di sigui fortalece su relacion profesional, academico y investigativo cu Museo Arkeologico. Tambe e mandatario lo desea di sostene un reunion cu e comunidad Guajiro residencia na Aruba.
“Nos ta preparando un bishita oficial di Gobernador di Guajira na Aruba… Nos a pospone e fecha ”, el a bisa. Sr. Rosa a agrega cu nan ta trahando riba un fecha nobo eventualmente entrante otro luna. E mandatario regional aki a caba di bishita Corsou; ya cu nan ta luchando pa fortalece e lasonan entre Guajira y e islanan ABC.
“Nos ta trahando fuerte pa sigui cu e relacion. Tambe cu un actividad hopi special caminda Gobernador di Guajira lo ta presente na juni”, el a declara.
E director a informa cu fundacion Rancho lo bay e localidad di Uribia (Guajira) pa presencia e festival cultural di indjan Wayuu cu lo tuma luga durante e delaster fin di siman di e luna aki.
