Blokeo di gobierno Venezolano contra Aruba ta afecta estado Falcon

E sancion di e gobierno Venezolano contra Aruba a bira un cuchiu skerpi di tur dos banda. No solamente nos isla ta resulta afecta cu e blokeo aereo y maritimo imponi pa presidente Nicolas Maduro, sino e mesun pueblo Venezolano y specialmente esunnan di estado Falcon, ta wordo castiga seriamente cu e decision unilateral di nan gobierno socialista.

Economista Randall Croes a indica cu economia di e tres islanan ABC afecta cu e sancion aki ta maneha cifra basta grandi cu ta contribui pa sostene economia di Venezuela. Aruba ta inverti casi 5 biyon y Corsou ta casi 7 biyon florin pa loke ta importacion di productonan. Aruba ta importa alimento pa 200 mil hende (local y turista) cu tin e poder di compra tur siman regularmente y capacidad di paga sin ningun problema.

Tin hopi agricultor chikito na estado Venezolano di Falcon cu ta depende di nos economia pa nan mantencion y esun di nan famia. Nos ta un mercado potencial y confiabel pa nan cu ta cumpra di manera regular cu moneda fuerte nan productonan. “Nan ta sufriendo masha hopi pa e situacion aki.”

Sr. Croes ta kere cu economia di estado Falcon y su hendenan tin miho nivel di bida pa motibo di e comercio intensivo cu nan tin cu Aruba y otro islanan di nos region. E beneficio aki ta wordo mira tanto pa nan exporta nan productonan cerca nos. Pero mirando e problema di cantidad di productonan cu ta scars na Venezuela, ora nan barconan ta na Aruba parti di e placa cu nan ta bende nan productonan, nan ta cumpra na Aruba den productonan cu nan mester y cu no ta haya den nan pais mes.

Nan ta productonan te hasta di primera necesidad, entre nan pamper, papel sanitario, lechi pa baby, vitamina, remedi, etc.. “Asina ta cu estado Falcon tin hopi beneficio y tin un bon nivel di bida den hopi zona di dje pa motibo di e comercio intenso cu nos.” Aunke e comercio bilateral aki ta trece beneficio pa tur dos banda, e sancion cu gobierno di Venezuela a impone, no solamente ta afecta nos isla so, sino cu nan propio hendenan ta resulta seriamente afecta tambe.

E Venezolanonan dedica na e actividad comercial cu nos isla, nan ta bin Aruba bende nan frutanan y berduranan, y nan ta haya nan pago na dollar. Pero warda dollar na Venezuela ta contra ley, pero no tin banco cu ta habri cuenta cu dollar. E ta un dilema si bo ta actua contra ley of no, ta dificil pa empresario Venezolano por sobrevivi. Pero a pesar di cualkier circunstancia nan ta logra manda nan productonan agricola pa nos isla.

Prijs mas barata
Nan productonan ta wordo bendi den supermercado, pero muy specialmente cerca e fruterianan. Nan ta berduranan fresco y mas barata cu ta abastece nos sector di restaurant, hotelnan, pero tambe nos pueblo. Sinembargo debi na e sancion aki nos tin posibilidad di bin cu frutanan y berdura for di otro pais. Ya caba tin negoshi cu nan biniendo cu e productonan aki fei Merca, Colombia y Republica Dominicana ya sea via avion of barco.

“Si nos tin druif di California, nos por tin tomati di California y siboyo di California’, segun sr. Croes. Pues nos por trece e tipo di productonan aki for di unda nos kier for di Merca te hasta Argentina. Pero logicamente e diferencia tin di haber cu e prijs, ya cu esun di Venezuela ta resulta mas barata pa e pueblo di Aruba pa motibo di e situacion di e moneda Venezolano devalua. Pero tambe e produccion cerca nan ta sali mas barata ya cu awa ta barata y salario ta hopi abou na Venezuela.

Economia na Venezuela tin poco ingreso y nan productonan ta bin nan bon prijs Aruba. Semper nan ta competi di manera insuperabel cu pa ehempel e frutanan y berdura cu ta bin for di Merca. E importadonan cu ta bin cu e productonan aki for di Merca dificilmente por competi cu esun di Venezuela.

Si tin producto cu ta prohibi pa sali for di Venezuela segun economista Croes ta facil pa bin cu cierto regulacion pa no permiti entrada di e productonan aki na Aruba. Den e caso aki nos por yega na un acuerdo comercial bilateral y formal, te hasta pa e productonan cu si ta permiti pa importadonan Venezolano bende na Aruba. Asina te hasta e mesun importadonan y agricultornan Venezolano por beneficia di dje. Como economista e ta bisa cu ‘reglanan claro ta pone tur cos florece den economia”, y asina tur dos banda ta gana.

Otro alternativa y scarsedad
Si e crisis aki ta sigui logicamente mester busca alternativa for di otro paisnan pa abastece nos isla cu e tipo di frutanan y berdura cu generalmente ta bin for di Venezuela. Logicamente nos ta importa nan na un prijs mas caro y por ta tarda un poco mas for di otro pais mas leu, locual ta demanda pa nan abastece regularmente nos isla pa evita scarsedad. Pero e problema ta e prijs, si e ta pagabel y si e restaurantnan cu ta custumbra na prijs barata e berdura di Venezuela, por adapta na dje. Pero e ta haya cu den poco tempo nos lo por custumbra na e prijs mas caro aki.

Sinembargo e ta haya cu lo ta un lastima cu esaki ta sosode te hasta pa e mesun agricultor y comerciantenan chikito di Venezuela. Pero tambe pa e lasonan di amistad y comercial entre Venezuela y Aruba.

Pa loke ta scarsedad di cierto productonan berdura y frutanan manera tomati, concomber papaya, bacoba e situacion lo normalisa e siman aki. E scarsedad aki ta debi cu e importadonan local no kier core risico grandi biniendo cu containernan for di Merca y despues na caminda ta wordo sorprendi cu Venezuela a lanta e sancion aki.

Bon Dia Aruba a consulta cu un fruteria cu a laga nos sa cu un par di containernan cu e productonan aki ta biniendo e siman aki for di Merca, pero tambe for di Colombia. E prijs lo ta mas caro ya cu si antes e prijs di tomati di Venezuela tabata 4 florin pa kilo, awor e ta 8 florin. E doño di un fruteria a bisa cu e consumidor mester bira mas consciente y adapta nan mes na e realidad nobo aki. Si por ehempel antes nan tabata cumpra barata un kilo di tomati Venezolano cu ta alrededor di 5 tomati pa 4 florin, pero di nan dos a putri debi cu no a uza nan, awor nan mester cumpra menos cantidad.

Pero berdaderamente ta poco tipo di frutanan y berduranan cu ta biniendo fei e pais bisiña. Nan a mengua hopi durante e ultimo añanan debi na e situacion interno na Venezuela. Si antes tabata bin 10 barco for di Venezuela pa abastece nos mercado local, actualmente tin 2 barco so.