Recientemente Kenneth Vrolijk a wordo nombra como Hefe di Mision pa e Weganan Olimpico Hubenil, Buenos Aires 2018. Kenneth Vrolijk ta un hoben di 22 aña di edad y e tin mas cu 1 aña y mey envolvi den e organisacion di Comite Olimpico Arubano. Esaki ta segun a e relato publica pa 297Sports.
funcion di sr. Vrolijk den COA ta yuda den e procedura di organisa y coordina proyectonan pa asina sigui desaroya e conocemento di nos entrenadornan di Aruba y alabes e federacionnan deportivo na Aruba. Na Aruba, Kenneth Vrolijk ta afilia na Estrella Basketball y ta referee di Aruba Basketball Bond. Mirando su edad hoben, su pasion pa e deporte y su trayectorio di trabou cu Comite Olimpico Arubano, a hay’e un bon momento pa nombra su persona como e Hefe di Mision di Aruba pa Weganan Olimpico Hubenil di Buenos Aires 2018.
“Mi no a pensa dos biaha ora mi a wordo acerca cu e proposicion aki. Cu alegria y satisfaccion mi a bisa cu mi ta cla pa tuma e reto aki mi dilanti. Awor aki e trabou mes ta bay cuminsa y mi ta cla pa cuminsa traha cu tur atleta y entrenador den e proceso di nan preparacion y clasificacion pa cu e Weganan Olimpico Hubenil di Buenos Aires 2018”, Kenneth a bisa hopi contento. Den luna di october proximo, Buenos Aires, Argentina, y Sur America lo haci historia via di bira e prome pais di e continente cu lo organisa un magno evento Olimpico Hubenil. Mas cu claro Aruba lo forma parti di e weganan mientras nos atletanan hubenil ta participando activamente na e proceso di clasificacion, tratando di logra un cupo y garantisa nan participacion.
