Diamars atardi mayornan di Alexander Flores a duna un otro actualisacion riba e recuperacion di nan yiu homber chikito, contando di su recuperacion fuerte y alabes anunciando su regreso cas. E bon noticia aki ta bin despues di casi un luna y mey despues cu Alexander a ser traslada pa Colombia den condicion critico.

Famia Flores a comparti cu siguidornan riba Facebook e ultimo resultado di MRI dia 3 di april, cual a duna resultadonan prometedor pa Alexander su recuperacion cognitivo. Un di e preocupacionnan mas grandi tabata si e criatura lo sufri di epilepsia debi na e daño cerebral cu el a ricibi despues di keda inconsciente den un auto cera pa un tempo largo. Manera e famia ta splica den nan publicacion riba Facebook, ora a trata Alex na hospital aki na Aruba, dokternan a constata varios convulsion severo durante e reanimacion di e mucha. Pa via di esaki, Alex mester a pasa den varios test di video EEG, cual ta monitorea señalnan neurologico durante 8 ora largo. Aunke e mayornan a resalta con dificil e tabata pa mira nan yiu chikito pasando den e proceso aki, nan a expresa ki alivio e tabata pa haya sa den e ultimo resultado di MRI cu Alex no ta sufri di epilepsia. Na mesun momento ta enfatisa cu ta importante pa keda monitorea e riesgo pa esaki.

Hungamento y movecion den aire liber como remedi

E mayornan a sigui conta con importante e ta pa Alex keda hunga, explora y sali pafo manera cualkier otro mucha di su edad pa e recupera na un manera saludable. Aunke e mucha ta hayando tratamento intensivo tur siman cu specialistanan, dokternan a enfatisa e importancia di hungamento den Alex su tempo liber. “Esaki lo yud’e reintegra exitosamente den su rutina bieu ora nos bolbe cas,” manera e mayornan a splica den nan publicacion online.

Alex ainda mester recupera su forsa, pero su mayornan ta conta cu su recuperacion ta visible caba. Cada dia e mucha ta papia mas y mas, y no ta keda sin move. E famia a hasta comparti cu nan por a sali cune den e region pa bay riba diferente “aventura”, pa asina Alex por mehora su agilidad y flexibilidad. Entre otro a conta cu e famia a subi sero di Monseratte di 10.000 pia halto, nan a logra bishita e parke grandi di Jaime Duque, y Alex a probecha di tur luga di hunga den e region, unda e mayornan a expresa nan felicidad pa mira Alex bula y hari.

Tratamento ta sigui na Aruba

Manera e mayornan a indica, Alex lo keda haya tratamento intensivo. Den e ultimo luna y mey, e criatura a bishita varios specialista, y ainda falta mas test pa sigui. Su mayornan ta splica cu esaki lo dura varios luna pa realisa, ya cu nan kier evita stress riba Alex su curpa.

Awor cu Alex a bin back Aruba, su tratamento ta sigui cu terapia. Aki par luna e mester bay back Colombia pa mas chekeo. Sinembargo, dokternan a keda asombra pa Alex su recuperacion rapido y exitoso.

Alex su regreso cas ta marca un logro sumamente grandi pa famia Flores, y su mayornan tabata contento di anuncia cu nan lo reuni back cu nan yiu muher mayor, Aryana, cu ken nan a keda den contacto via video call tur dia.

E caso di Alexander a bira uno inspirante pa comunidad di Aruba, unda e resiliencia y forsa di ambos e criatura y su famia a desafia tur expectativa negativo. Pa su siguidornan y demas comunidad, e bon noticia aki sigur ta trece gran alivio.

E caso

Diamars dia 24 di februari 2026 comunidad di Aruba a keda den shock di un noticia di un mucha homber di 5 aña cu a ser haya den un vehiculo di e crèche cu e tabata bishita. Segun a reporta e tempo ey, supuestamente a lubida cu e mucha (Alexander) tabata den e vehiculo y a hay’e 5 ora despues inconsciente. Tambe a reporta cu su curason a para y mediconan na ImSan tabata purba di reanima e mucha lo mas lihe posible pa evita mas daño cognitivo.

Porfin a logra reanima e criatura y a traslad’e inmediatamente pa Colombia, unda te ayera el a keda bao tratamento intensivo.

E prome dianan despues cu Alexander a yega Colombia e tabata den ICU, luchando pa su bida. Dokternan a haci diferente test, incluyendo MRI, pa compronde miho su condicion. Na un momento, resultado di un di e MRI-nan tabata un tiki mas faborable, loke a permiti e ekipo medico purba kita e tubo di hala rosea pa duna su curpa un chens pa hala rosea riba su mes. Sinembargo, e siguiente dia a keda cla cu su pulmonnan ainda no tabata suficientemente fuerte. E tubo a mester ser poni back.

E siguiente dianan, su pulmonnan a mustra poco mehoracion, aunke ainda tabata fragil, y a ripara tambe cu su curpa tabata retene likido, pero danki na remedi y cuido intensivo, esaki a logra ser controla.

Alexander su recuperacion na un punto a encontra un complicacion na momento cu algun di su organonan cu inicialmente no tabata mustra daño a cuminsa debilita, y su temperatura a subi varios biaha. Dokternan a sigui haci test y cambia tratamentonan pa trata di combati e complicacionnan.

Despues di varios dia di incertidumbre, algo extraordinario a pasa. Alex, cu a pasa mas cu un siman y mei sin reaccion, finalmente a habri su wowonan.

Desde e momento ey, e ekipo medico a cuminsa cu diferente test pa evalua su cerebro, su funcion cognitivo, motorico y desaroyo, y Alexander a haci un recuperacion milagroso.

Hopi den comunidad a keda indigna pa e incidente lamentable aki, y varios a critica fuertemente e doño di crèche y a haci yamado pa un castigo fuerte. E situacion tambe a habri wowo di parlamento, unda parlamentario Jennifer Arends-Reyes a manda preguntanan pa minister di Educacion Gerlien Croes tocante e Landsverordening Kinderopvang (informalmente ley di crèche) cu cual a cuestiona e contenido di e ley y e proceso di implementacion.

Pa locual ta e investigacion riba e caso di Alexander Flores, Bon Dia Aruba a acerca Ministerio Publico (OM) pa un actualisacion. Segun vocero di OM a conta, lo ta te otro siman cu por duna mas informacion tocante e investigacion. Bon Dia Aruba lo keda pendiente di esaki.

Imagennan ta saca for di video comparti pa mayornan di Alex riba red social.