Den  mas di 45 consehonan desde 2014 CAFT tabata urgi e gobiernonan di Aruba pa cumpli cu palabracionnan haci y percura pa un “gezonde overheidsfinancien” y introduccion di e reglanan estricto di Bon Gobernacion. Desde 2011 caba UPP a bin ta boga pa introduci reglanan di Bon Gobernacion, pero e hecho ta cu a scohe pa sigui goberna con cu ta. Prueba di esaki ta p.e. e cantidad di manipulacion den tanto e gobierno di AVP como esun di POREDmep. Y ta parce cu esun nobo lo no ta diferente.

Loke ta resalta ta cu sin ta formalisa, COHO i.o. ta haci loke e kier, mientras cu  gobierno actual ta guli manda bou. COHO i.o.  ta “in oprichting” y ainda no ta un entidad legalmente estableci.

Tin varios aspecto den e “Landspakket” cu nos ta para 100% su tras, pero tin algun aspecto cu nos ta totalmente contra.

Den un articulo anterior nos a mustra caba, riba cambionan cu lo bin den e leynan laboral y e LTU! Kico e asuntonan aki tin di haber cu loke Caft tabata conseha anteriormente? Dicon mester torno na e ley di retiro? Dicon laga e fenomeno di “hire & fire” haci su entrada atrobe? Dicon mester flexibilisa e LTU? Aruba no ta sobrecarga caba? (Ambos den tema E landspakket Aruba bow E.1).

Den e “Landspakket Aruba” tin varios otro veneno cu nos Prome Minister a acorda cu Hulanda aña pasa, usando e pandemia como un “kapstok” pa hustifica e traicion di dia 13 di november 2020. Nos tur sa loke a ser acorda NO tin nada di haber cu e pandemia. Pandemia ta wordo usa como un “smokescreen” pa tapa e malgobernacion y corupcion cu tabata tin den e gobernacionnan desde fin di 2009. Pues simpelmente falta di confianza.

Atrobe djis pa ilustra algun ehempel di e “recolonizacion” di Aruba dor di ” politiek Den Haag”  nos kier mustra p.e. den loke ta para den Cuido bow di Tema F.3.

Den campaña a fulmina contra tur esunnan cu a trece padilanti cu ta e intencion pa introduci un “eigen bijdrage” y cu lo bay torno na e pakete di AZV. Te hasta a ser bisa “over my dead body”, wel ate aki. COHO “i.o” a duna nan den nan “body”!

Despues di eleccion, e gobierno actual atrobe ta pasa e pueblo e cuenta pa malgobernacion y corupcion. Pa haya e fianza, e patient lo no tin e mesun derechonan mas. E lo mester bay paga cada bes cu e kier bay su dokter. Dicon MEP no a bisa pueblo esey den campaña? E pakete aki tabata conoci pa esunnan cu tabata forma parti di e gobierno aki caba. Esaki ta “kiezersbedrog” den optima forma! Por papia ainda di integridad????

MEP a nenga rotundamente cu lo hisa e edad di pensioen. Es mas, a priminti cu esaki lo no sosode.

Den e Tema E bou di E.5 ta poni hopi cla cu Aruba lo hisa e edad di pension na 2025 pa 66. Es mas, lo por keda sin haci esaki si un instituto apunta pa COHO i.o. indica otro. Ora sigui lesa ta bisa cu si resulta cu mester hisa e edad mas ainda lo haci esaki tambe y si mester lo introduci mas medida!!

Cu otro palabra “hou je hart maar vast”!!

E veneno mas cruel ta esun cu ta scondi bou Tema B bow di B.2 y B.4!  Aki e COHO i.o. posibelmente lo bay hiba empresanan estatal, cu no ta eficiente y no ta sirbi interes publico pa e altar di sacrificio! Ya caba partidonan cu ta conforma e gobierno aki a duna di conoce cu nan ta hopi liberal den esaki.

Aki mesora mi pensamento ta bay riba e.o. Arubus y Serlimar.

Ta prefera di “decentralisa” Serlimar prome, envez di haci un investigacion profundo di e fechorianan di Otmar, ayuda pa su persona di confianza cu por cierto awe ta e “liasson ” di e prome minister pa COHO i.o. #hetkanverkeren.

E cuchui mas skerpi ta wordo hinca den lomba di e empleadonan publico. Dicon den campaña no a bisa esakinan cu tin un “zwaard di Damocles” colga riba nan cabes? E sentencia di e grupo aki ta hinca den Tema B bow B.4, B.5, B.6, B.9 y  B.10.

Resaltante ta cu tanto e puntonan B.4 y B.5 ta Hulanda ta e UNICO actor. Den esaki nan ta papia un reduccion di 20% den 5 aña. Pues e entidad colonial su SO lo dicidi. Y pa colmo e rapport di investigacion ta cla. Dicon pueblo no por haya copia di e rapport aki? Of ora cu Hulanda implementa esaki pueblo lo haya sa??

Atrobe durante di campaña a keda “muisstil” tocante e introduccion di un BTW di 12% y e.o. cambionan den nos sistema fiscal.(Tema C bow di C.1) Esaki lo nifica p.e. cu lo bay elimina e “aftrekbare posten” pa e ciudadano? Den e Tema D bow D.3 ta papia di e posibilidad di e asina yama “Dolarizacion”. Kico un tema asina tin di haber cu un prestamo pa motibo di e pandemia?

Despues di a tuma tempo pa pasa riba e documento aki, e conclusion ta cu ki motibo tin pa celebra dia di Himno y Bandera?  Dia 13 di november 2020, nos a perde tur e base pa celebra e hecho cu ta conmemora e Status Aparte di Aruba.

E lucha di pueblo di Aruba tabata pa sali for di e “juk” di Willemstad! Y nos a logra esaki. Pero  dor di e traicion riba e Black Friday 13 di november 2020 nos ta bay cay bou di e “juk” di Den Haag!!

Ta pesey dia 13 di november mester ta un dia pa “conmemora” e “cohonizacion” di nos pais. Poco poco nos lo bira un colonia di tempo moderno. E “kraaltjes en spiegeltjes” a wordo cambia pa un “pulchi di placa”!

Mescos cu e Indjannan a sali riba caya y ta pidi atencion pa nan status di Indiginas, nos tambe mester lanta para particularmente pa e hecho cu lo bay laga por lo menos 72.000 hende drenta, pa conmemora dia 13 di november tambe como e Dia di e Indiginas, pues e dia di e “Arubiano”!