Integridad ta un tema hopi popular den pueblo y sigur den Parlamento den e ultimo añanan. En berdad na 1997 Aruba tabata e prome nacion den Caribe Hulandes cu a bin cu un iniciativa pa un ley di screening pa minister. Sinembargo despues di varios intento esaki nunca a keda aproba.

Ultimo biaha cu a trata e ley aki di Landsverordening Integriteit Ministers, el a keda desaproba un biaha mas. Esaki ta algo sumamente lamentabel y sigur condenabel. Lamentabel pasobra nos ta compronde cu un Ley manera esaki ta algo sumamente importante. Mas cu nunca nos pais mester tin leynan den lugar cu lo percura cu nos tin lidernan den gobierno cu no tin nada di sconde.

Pueblo ta desea pa wak leynan den lugar cu lo evita nos como pais pasa berguensa pa via di falta di integridad. Raad van Advies a duna su ultimo conseho cual a drenta riba Mei 26, 2021 riba e OLV Integriteit Ministers. E consehonan aki di RVA a wordo adopta den ley nobo aki cu ta cla pa pasa den Parlamento pa wordo aproba den e dianan nos dilanti.

Aunke nos a tuma e iniciativa pa trece un ley di screening pa minister na 1997, tanto Corsou y St. Maarten a pasa nos na caminda na 2012 y 2014 respectivamente y awor ta goza di un ley asina aki na nan pais. Aruba a keda atras compara cu e paisnan aki, y semper bay nos di fraccion Mep a keda lucha pa por wak un ley manera esaki keda cla. E Ley aki ta un di e prome pasonan firme cu nos ta tumando pa pone mas leynan den lugar cu ta bay trece mas transparencia y seriedad den nos gobernacion. Den e ultimo añanan e palabra integridad y corupcion a resona den gran manera tur caminda den pueblo y e medionan di comunicacion. Tambe nos por a constata esaki durante di campaña y eleccion.

Nos di fraccion Mep ta decidido di vota pa un ley cu lo bira un standard y e cuminsamento di un nivel di transparencia cu pueblo kier wak den e diferente areanan di gobernacion, negociacion y liderazgo. Y pueblo por ta sigur cu nos lo sigui lucha pa wak e ley aki pasa den Parlamento.

Pronto lo tin bin un reunion publico pa trata na aproba e ley aki un biaha mas. E trabao apenas a cuminsa, pasobra nos ta stima nos pais. Mi ta invita pueblo pa wak y sigui e reunion publico aki masalmente y husga kendenan ta esnan cu ta apoya integridad y kende constantemente ta haci cualkier cos pa stop e ley aki di wordo aproba.

LEAVE A REPLY

Please enter your comment!
Please enter your name here