Mester constata cu definitivamente gobernacion di Aruba ta stagna. Un ex-minister cu ta ser investiga pa corupcion y abuso di poder, ainda ta dirigiendo e gobierno.

Esaki claramente a sali diabierna ultimo for di e reunion di parlamento, unda a trata e retiro di Minister Marisol Lopez -Tromp. Nos por a mira un reunion yen di “kakafonie” na comienso cu menaza y tambe expresionnan menos agradabel den direccion di mesun miembronan di partido y coalicion, loke sigur no lo contribui pa un relacion di trabou placentero pa algun tempo.

Hopi ta esnan cu a keda decepciona despues di e “schorsing di 10 minuut” cu a dura un eternidad, pa despues bin un schorsing “tot nader orde”.

E expectativa pa e di dos tanda tabata halto. Pueblo kier a haya sa mas, pero coalicion diripente a cambia di opinion y en bes di retiro a haci un peticion pa mas intermediacion. Diasabra minister di Husticia tur abati, ta bin bisa cu awor si e tin pasenshi pa sigui lapi y lijm y tambe cu e no tabata tin chens di defende su mes den parlamento. Tambe nos por a scucha di e lider actual di e partido por cu ela lamenta e critica cu minister Lopez-Tromp na un manera no-etico a ataca su propio coleganan minister. Pero unda e ministernan aki tabata ta? Segun nos constitucion, den capitulo III articulo 18 ministernan ta liber pa atende y participa na reunionnan publico di parlamento,cu of sin cu nan a wordo invita!

E tragi-comedia aki, cu sigur a bin ta pone cara di nos pais Aruba na berguensa mirando e rol mediocre di nos parlamentarionan, tabata tin un “miron” cu sigur a gosa di e situacion aki. Esta Hulanda. En bes di enfoca na atende cu e demandanan Hulandes, nos politiconan na Oranjestad ta haya gana pa cuminsa cu polemica politico partidista cu ta haci nos situacion mas debil ainda. UPP riba 20 di april a bolbe propone na gobierno di Aruba pa yama un dialogo nacional y sugeri pa bini cu gabinete nacional pa atende e problemanan cu a presenta cu Hulanda. Riba 24 di juli ultimo UPP a manda pa parlamento un peticion pa institui un dialogo nacional pa asina nos yega na un consenso nacional con nos ta sali for di e cadena di crisisnan cu nos ta aden. Na e momento ey parce cu e atencion tabata dirigi con pa bula un minister su cabes, meramente pa interesnan personal y partidista. E actuacion aki sigur ta debilita mas nos posicion pa cu gobierno Hulandes. Nos ta demostrando un inmadurez total pa nos por resolve nos problemanan y salvaguardia nos autonomia y defende nos derecho di autodeterminacion.

Drentando luna di augustus cu lo por ta un luna determinante pa cu nos autonomia y sosten prespuestario di gobierno Hulandes, e acontecimento- y desaroyonan politico di e ultimo simannan cu su culminacion diabierna ultimo, ta pone nos di UPP sinti cu nos lo bay conoce un otro “augustus scur” na Aruba. Y compara cu e “augustus scur” di 43 aña pasa, cu den nos historia politico ta wordo relata como un hecho positivo cu a contribui na realisacion di nos status aparte, e “augustus scur” di 2020 lo bay tin su connotacion negativo, ya cu e por hiba na hustamente na perdemento di nos autonomia, memey di un instabilidad politico y destructivo, dota di un polarisacion enorme y politisa. Nos prioridadnan na e momentonan aki parce di ta robes. Si nos no baha for di e cabay partidista y kita nos brilnan di nos colornan politico y pone e bril di e bandera di pais Aruba, nos lo haya nos ta doblega pa Hulanda den e luna aki.

P’esey UPP ta bolbe haci un yamada, pa tur e partidonan cu representacion di parlamento, nos gobierno actual, pa recapacita y pensa cu pa e aña cu ta resta pa eleccion, bin cu un gabinete nacional den forma di un zaken/takenkabinet/crisiskabinet cu ta carga sosten di tur partido den parlamento. Un periodo di eleccion awor, manera ex-lider di mep ta propone, no ta cumbini Aruba na e momentonan aki. E cambio di idea pa e dos partidonan aki bay traha cu otro sigur ta uno bon bini, pero UPP ta kere cu e dos partidonan aki mester mustra e intento aki awor, memey di e crisis actual. Si nan cera cabes cu otro por bin un gabinete di expertonan cu lo tin di traha riba un lista di tareanan specifico di e.o. Mara mannan di e politiconan, pa asina percura pa crea un ambiente nobo na momento cu eleccion di 2021 presenta. “united we stand, divided we fall and perish”!