Booshi Wever(UPP): ‘E publicacion di standard & poor’s ta basa riba poor standards di 2012? Y cu mas medida na caminda’

Sigur nos mester concorda cu minister di Finanzas y Economia, cu na momento cu tin bon noticia pa Aruba, mescos cu p.e. un atleta gana e prome medaya olimpico pa nos pais na un Pan-Americano, esaki mester wordo comunica na nos pueblo y den cierto forma laga e pueblo sinti di hubilo pa esaki.

Pero no por ta asina cu ta purba na “mislead”, desvia of na engaña un pueblo, cu un noticia cu defacto no ta cambiando nada na e situacion di Aruba, si nos kier keda kere den un instancia internacional manera un “Standard & Poor’s”.

Tin biaha parce cu e ansha of e deseo pa gana simpatia di un pueblo, ta pone mandatario-, parlamentario- y demas politiconan no pensa dos biaha prome cu core haci un show of purba na “brainwash” e pueblo cu ta trata di un logro grandi. Y aki ta unda nos ta mira con fanaticonan ciego ta core di ta di hubilo y purba na ridiculisa esunnan cu kisas no ta di mesun opinion cu loke gobierno ta presentando.

Den un sistema democratico, semper mester ta existi e espacio pa discusion y diferencia di opinion. Nos sistema democratico no solamente uno di bay di urna electoral cada tanto tempo y djey laga un grupito goberna nos pais, sin por purba na informa y educa e pueblo cu un medaya tin mas cu un banda. Nos por a mira cu p.e. na momento un reportero a trata di mustra cu tin un otro banda tambe, ta core atake. Na UPP su parecer, a pesar di color politico di p.e. un reportero, e mester respeta su profesion y trata na informa e comunidad pa di e manera ey educa e comunidad.

Banda di esaki tambe ta baha formal riba esunnan cu ta tuma tiki tempo pa informa nan mes y purba di pasa esaki pa comunidad, pa asina contribui na formacion di opinion. Esaki meramente riba echonan y no riba e persona mes. Y haciendo esaki na un forma obhetivo, nos ta contribui na un desaroyo sano di nos comunidad. Y manera Nelson Mandela a yega di bisa: “No country can really develop unless its citizens are educated”!!

Y esaki mester ta un tarea di cualkier ciudadano pa yuda su comunidad den esaki, sea e ta un journalista, un politico, un studioso, un docente of un profesional.

Ora nos repasa e rapport ultimo di S&P, basicamente e “rating” ta keda mescos, pero ta e “outlook” ta cambia pa uno mas positivo. Pero “outlook” no ta bisa nada ainda cu e situacion a cambia, sino no ta lag’e na e mesun “rating”. Basicamente e rapport ta papia di e cambio den e “forecast” mirando e medidanan y cambionan fiscal cu a tuma luga desde 2018 y cu ta spera cu entre otro e curso di reformacion fiscal sigui su rumbo. Cu otro palabra nan ta spera mas medida of manera gobierno ta gusta bisa, ahustenan. Nan a avisa tambe cu lo por bin cambio negativo den e rating, si den e siguiente dos añanan resulta lo tin un “unexpected slippage” (pues no logrando loke ta propone) den e maneho fiscal cu lo por stroba nos estado di cuenta of cu si por bin cambio den e relacion cu Hulanda. Y cuidou cu esey no bai pasa proximamente.

Nan ta mustra cu awor aki apenas gobierno ta den e fase di comienso di stabilisacion fiscal a pesar cu e gastonan di gobierno parce di ta den forma structural y cu lo ta dificil pa “buig” esaki. E ultimo sigur mirando e gastonan enorme cu e proyectonan di infrastructura, manera careteranan y hospital (y otro proyectonan), lo mester wordo carga den e añanan nos dilanti. Y ainda nos por mira cu pa varios minister parce cu “the sky is the limit”.

Un biaha mas, S&P su reportahe NO ta un cos di canta macamba, ni di lastra macamba. Den pasado, na 2012 nos a yega di keha na e compania aki, pa otro prediccionnan cu nan tabata tin, unda nos a acusa nan di tin poor standards!!

Awe esunnan cu a critica e mesun compania aki na 2012, ta uza e mesun resultado pa splica con bon cos ta awo. Pregunta ta kico y con e compania di S&P aki a wordo informa? A haci mescos cu 2012? E tempo ey deliberadamente a laga hopi informacion afo y prospectonan negativo afo, manera un Green Corridor, un hospital, etc.?

Y awor, con leu S&P a midi e efectonan di e diferente hotelnan cu ta na caminda, particularmente esun di 900 camber na Baby Beach? Kico ta gastonan extra cu ta bay bin riba nos infrastructura, cu gobierno lo mester percura pe? Gastonan di binimento di mas hende for di afo y cu lo trece nan famianan cu mas bien lo nifica mas problema social? E presion financiero cu lo wordo crea pa bin cu mas cuponan di school, mas maestro, mas vivienda, mas AZV, mas cuido medico, mas siguridad etc.

Y nos no POR lubida e SPROOKJE fabuloso di Ot-Nar, cu ta de facto un PPP, cu lo bay costa laba laba cu un mei biyon florin. Y cu lo bay subi nos quota di debe riba 100%!!!

Pues pa termina nos kier uza e mesun palabranan di e minister di Finanzas actual, cu na 2012 e.o. a reaccion riba e rapport di S&P: (cita)

“Pero locual nos mester wanta nos curason pe ta, e medidanan cu Gabinete Eman mester bay pasa pa asina por sigura cu e rating di nos Pais por keda positivo. Pasobra te ainda Gabinete Eman no tabata sincero cu Pueblo pa splica cual ta e medidanan cu mester wordo tuma pa por cumpli cu S&P.”

Y hustamente esaki ta locual nos ta puntra nos mes tambe awor. Tin algo a cambia!????