Gabinete Wever-Croes ta haciendo tur locual cu ta humanamente posibel, bou di e circunstancianan financiero precario cu nos pais ta aden, pa por apoya, asisti y duna sosten na hendenan mas vulnerabel den nos comunidad.
“Como Minister di Asunto Social, nos ta brinda tur apoyo unda ta necesario y posibel pa garantisa cu #NiunMuchaTaKedaAtras. Cu tur mucha su derechonan universal entre otro riba enseñansa, ta wordo respeta y salvaguardia”, segun un comunicado di gobierno.
Specialmente pa yiunan di mayornan cu ta riba bijstand, Minister Glenbert Croes recientemente, un biaha mas, a aproba pa Departamento di Asunto Social contribui cu gastonan escolar te na un maximo di Afl 800 pa famia. Cada mucha cu ta bay scol regular ta haya un ayudo di Afl 220. E contribucion di mayor ta yega e suma di maximo Afl 120 y ta paga esaki directamente na scol.
“Situacion pa hopi famia ta dificil y p’esey nos kier contribui pa percura cu tur mucha por bay scol bon prepara sin preocupacion”, e mandatario a expresa.
Ta bon pa mayornan tene bon cuenta, cu si pa e fecha di 30 di augustus no entrega e formulario, cu lo blokia e bijstand pa luna di september. Pues un apelacion na tur mayor pa cumpli cu e yamada aki, pa evita un situacion fastioso.
Na e adultonan cu tin 24 aña of mas, cu ta hayando asistencia social pa nan por atende enseñansa regular sea na IPA of Universidad di Aruba, tene cuenta cu e ultimatum aki, ya cu e ta conta pa tur hende cu ta studiando.
Nos kier pa tur mucha cuminsa scol trankil. Nos kier pa tur mayor ta trankil cu gastonan escolar ta cubri. Pa Gabinete Wever-Croes, e ser humano ta central y ningun mucha mag di keda atras. Esaki ta e punto di salida den loke ta e maneho y vision di Minister di Asunto Social y Labor, e comunicado ta finalisa.
