Bossi Volunteers ta un grupo di boluntario cu ta brinda nan servicio pa yuda esnan den necesidad den e situacion cu ta pasando actual na Aruba y mundo pa e COVID-19.

Jean Marc Antersijn, lider di Bossi Volunteers ta splica cu normalmente nan tin un compania surveillance camara unda cu nan tin diferente cliente na Aruba, pero mirando e situacion cu a pasa aden, a ripara cu e trabounan a cuminsa baha.

Pa e motibo aki a dicidi di bin cu un grupo di boluntario pa yuda tur hende pa keda cas y ‘flatten the curve’. Cu e forma aki Bossi Volunteers lo duna un man na persona cu en berdad mester di e yudansa.

Bossi Volunteers a dicidi pa haci entrega pa hende den necesidad cu no por sali for di cas, recientemente nan a ricibi contacto di un señora cu ta haci cuminda tur siman pa famia nan cu en berdad no tin nada di come den e ultimo dianan cu e situacion di COVID-19 ta trece cune.

Pa motibo di e situacion y cu famia tin tres yiu na cas, el a dicidi pa yuda nan totalmente gratis anto bay supermarket pa haci compras di producto pa come y bebe. Antersijn ta splica cu na momento el a yega e cas, el a keda impacta cu e muchanan no tabatin cuminda, no tabatin producto pa nan por cushina, cosnan di bebe, ni tampoco cosnan pa e muchanan hunga ‘absolutamente nada’.

Su pensamento tabata cu e mucha no tin fout di e situacion cu nan ta pasando aden. Sinembargo ora el a wak cu el a yega cu e caha di cuminda, nan no por a kere cuanto producto di come a wordo treci pa nan.

Pa motibo di e virus andando, Antersijn ta bisa cu e no por a duna nan un brasa of hunga futbol cu nan. “Mi kier. A mustra cu si tin hende cu ta pensa riba nan den e momentonan dificil cu tin awo.”

Bossi Volunteers ta pidi pa hende sigui comparti e trabou cu nan ta haciendo pero mas pa pidi persona pa aporta na e reto pa coopera cu un producto. “Boso lo por drumi hopi mas miho pa sa cu un mucha mas tin cuminda awe nochi”, e ta expresa.

E servicio di Bossi Volunteers ta keda pa preveni hende subi riba caya pa evita e virus si brota. “Nos no ta pidi nada, e ta algo completamente boluntario cu ta Sali bunita di nos curason. Y hende ta aprecia esey cu nos ta Sali di nos cas pa haci nan e fabor y nos ta aki pa yuda nan.”

Antersijn ta encurasha pa esnan cu por yuda cu algo na famianan cu ‘di berdad ta pasando duro’ por haci un impacto den nan bida. Si nan tin cualkier producto di ofrece cuminda ten a wega, nan mes ta pasa busca esaki. Si kier evita contacto cu hende por laga nan dilanti nan cura y Bossi Volunteers lo busca y deliver esaki na e famia cu mas mester di dje. Pa cualkier pregunta por tuma contacto na Whatsapp cu Jean Marc Antersijn na 5663750.