(La Nacion) – Diasabra ultimo, miles di persona a sali riba e caya di varios capital Brasileño pa protesta contra e presidente ultra-derechista pa su gestion di e pandemia, cu ya caba a laga mas di mey miyon di morto na e pais, medionan principal Brasileño a informa.

Diasabra, Brasil a yega na 500.022 morto pa Covid-19, segun e consorcio di prensa conforma pa varios medio di comunicacion.

For di trempan, hopi manifestante a uni na Rio de Janeiro, Brasilia y Recife, entre otro 15 capital, defendiendo frasenan como “Pafo Bolsonaro”, “Pafo Genocida”, “Gobierno di hamber y desempleo”, “Vacuna ya” y “Vacuna den brasa cuminda den tayo”.

E actonan a wordo convoca pa e gruponan Brasil Popular y Povo Sem Medo (Pueblo sin Miedo), forma pa decenas di organisacionnan social y sindical, apoya pa partidonan y lidernan politico, entre nan e ex-presidente iskierdista Luiz Inacio Lula da Silva (2003-2010). Sinembargo, Lula no tin planea participa den e actonan, su asesor di comunicacion a informa.

Dos dia prome, e ex-mandatario a bisa cu e no kier pa cu su presencia lo domina “un manifestacion convoca pa e sociedad Brasileño”.

E personanan cu a sali pa protesta a usa tapa boca y a expresa nan preocupacion pa e avance di e pandemia ora e pais ta drentando den su di tres ola di contagio.

Cu mas di mey miyon morto, Brasil ta e di dos pais den e ranking di mortalidad di e pandemia despues di Merca, cu ta supera 600.000.

E programa di vacunacion a cuminsa na januari despues di presion di e rival politico di Bolsonaro, Joao Doria, ken ta encarga di e gobernacion di Sao Paulo y a haya un acuerdo cu e laboratorio Chines Sinovac pa importa e prome dosis di su vacuna Coronavac. For di e ora ey, 11.5% di e poblacion Brasileño so (212 miyon persona) a wordo vacuna.

Un comision parlamentario ta investiga e accion di gobierno pa enfrenta e pandemia. Varios dirigente a califica Bolsonaro di “genocida” pa su rechaso na e medidanan di aislamento social y uso di tapa boca y e retraso di gobierno pa e campaña di vacunacion.

 

LEAVE A REPLY

Please enter your comment!
Please enter your name here