(NLTimes) – E ta un escenario realistico cu coronavirus lo bolbe tin un brote durante herfst, segun minister di Salud, Hugo de Jonge a skirbi den un carta na Tweede Kamer. E gabinete pa e motibo aki no por exclui e posibilidad di otro lockdown.
“Kico exactamente lo pasa den herfst, cua restriccionnan lo ta necesario pa combati un di cuatro ola, nos no por bisa ainda sigur”, De Jonge a declara durante un conferencia di prensa durante weekend. “Mutacionnan (variantenan) ta keda un riesgo, specialmente si nan ta mas resistente pa vacuna.”
E desaroyo di crisis di coronavirus ta depende riba varios factor, segun De Jonge, manera si un variante nobo di coronavirus ta plama na Hulanda. Variantenan di coronavirus por ta immuun na e vacunanan di Covid-19 actual.
Segun un calculacion di RIVM, e variante delta di coronavirus ta responsabel pa 10 porciento di tur test positivo di coronavirus. Ta bisa cu e variante aki ta un tiki mas infeccioso cu e variantenan di coronavirus cu a circula na Hulanda te awo. Actualmente, alrededor di 90 porciento di infeccion por wordo vincula na e variante alpha.
Prome minister demisionario, Mark Rutte a bisa cu ta demasiado trempan pa completamente elimina e regla di 1.5 meter di distancia social. “Nos sa cu si nos elimina e medida aki demasiado trempan, e chens cu e virus ta plama ta aumenta. Hopi hende ainda mester haya vacuna y tin incertidumbre tocante variante delta.”
De Jonge a declara cu cualkier aumento den caso mester wordo conteni lo mas lihe posibel. Pa e motibo aki lo mantene capacidad di testing te cu februari 2022. Contact Tracing haci pa GGD tambe lo keda na luga ampliamente. “Si brotenan local tuma luga, e ora bo mester bula riba nan, loke en todo caso mester inclui restriccionnan pa e region specifico en cuestion”, Rutte a bisa. Di e forma aki e gabinete ta spera di preveni cu un brote grandi lo tuma luga.
