Famia di presonan cu a ser asesina durante un motin den un prizon na nort di Brasil, a yega diamars pasa te oficina forensico pa identifica e 58 victima. Algun di nan a desmaya ora nan a wak e curpanan decapita di nan ser keri.
Cu intencion di evita mas violencia den prizon di Altamira, na estado di Para, autoridadnan a cuminsa transferi 46 preso pa otro prizon, despues cu e enfrentamento di dialuna pasa entre gangnan rival a resulta den 16 persona decapita. Autoridadnan local a señala cu, por lo menos, 33 preso a ser transferi diamars pasa pa e capital estatal di Belem pa reasignanan.
E expertonan forensico di ciudadnan bisiña di Para a yega pa yuda cu e cantidad grandi di cadaver. Nan a warda e curpanan den un truck cu frigidaire cu a yega na Altamira despues cu e noticia di otro masacre den interior di prizon a bira conoci.
Autoridadnan estatal a bisa cu e enfrentamento di dialuna a sosode ora e grupo local Comando Clase A a ataca un parti di e prizon cu ta aloha miembronan di e gangnan rival Comando Vermelho, of Comando Cora.
Miembronan di Comando Clase A, a kima e container ora e presonan di Comando Vermelho tabata temporalmente bibando mientras otro parti di e prizon tabata den construccion. E mayoria di e victimanan a muri di asfixia (stik).
Ainda autoridadnan no a revela e causa exacto di e atakenan reciente na Altamira; nan a confirma so cu tabata un lucha entre gruponan di gagnan. Sinembargo, varios di e ultimo masacrenan paden di prizon ta atribui na enfrentamento entre gangnan pa control di ruta di narcotrafico den Amazonas.
